Bab Mahkemesi 54 Numaralı Sicil (H. 1102 / M. 1691) cilt: 20, sayfa: 63 Hüküm no: 18 Orijinal metin no: [3a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye bt. Mehmed’in Osman Çelebi b. Bekir’den muhâlaa yoluyla boşanması Mahmiye-i İstanbul’da Ergili mahallesi sâkinlerinden olup, zâtı ma‘rifet-i şer‘iyye ile ârifân Mehmed b. Hasan ve Hüseyin b. Ali nâm kimesneler ta‘rîfleriyle mu‘arrefe olan Rukiye bt. Mehmed nâm hâtun meclis-i şer‘-i şerîf-i enverde, zevc-i dâhili bâ‘isü hâze’l-kitâb Osman Çelebi b. Bekir mahzarında ikrâr ve takrîr-i kelâm edip, zevcim mezbûr Osman Çelebi zimmetinde mütekarrir ve ma‘kūdun aleyh olan dört yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Osman Çelebi ile muhâla‘a-i sahîha-i şer‘iyye ile muhâla‘a edip, ol dahi hul‘-ı mezbûru kabûl eyledikden sonra hukūk-ı zevciyyete müte‘allika âmme-i da‘vâdan her biri âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mustafa Efendi b. Musa el-imâm, Şeyh Mehmed Efendi b. Âdil, Halil Çelebi b. Ali, Mehmed Çelebi b. Hasan, İbrahim Çelebi b. Ahmed, Mehmed Çelebi b. İbrahim, Ali Çelebi b. Bâli, Ahmed Çelebi b. Ahmed.