Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 793 Hüküm no: 640 Orijinal metin no: [147b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Çavuş’un varislerinden Ayşe Hatun’un mirastan hakkını aldığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den irsâl olunan Mevlânâ Mehmed Efendi b. Ali’nin Mahmiye-i İstanbul’da Öksüzce mahallesinde sâkin Mehmed Çelebi b. Halil’in menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i şerîf ettikde mahalle-i mezbûre ahâlîsinden olup vilâyet-i Rumeli’nde Semendire kasabasında müsâfiren vefât eden Mehmed Çavuş b. Yahya b. İslâm’ın verâseti li-ebeveyn kız karındaşı olup vilâyet-i Anadolu’da Akçaşehir kazâsına tâbi‘ Haslar karyesinde sâkine Âişe Hatun ibneti’l-mezbûr Yahya b. İslâm nâm gāibe ve usûbet-i nesebiye cihetinden hasren vârisleri li-ebeveyn ammi oğulları Mustafa Beşe ve Mehmed Beşe b. Sunullah el-mezbûr İslâm’a münhasıra ve tashîh-i meselesi dört sehmden olmak olmağla sihâm-ı mezbûrenin iki sehmi gāib-i mezbûre Âişe ve bâkī iki sehmin birer sehmi mezbûr Mustafa ve Mehmed Beşe’[den] her birine isâbeti tahakkukundan sonra mezbûr Âişe Hatun ibneti’l-mezbûr Yahya tarafından husûs-ı âti’l-beyânda da‘vâ ve taleb ve ahz u kabz ve ibrâya ve kendüye îsâle vekîl olduğu zât-ı mezbûreyi [148a] ma‘rifet-i şer‘iyye ile ârifân mahalle-i mezbûrede sâkin Ahmed Beşe b. Mehmed ve Hasan Beşe b. Hüseyin şehâdetleriyle mahzar-ı hasm-ı câhidde sâbit olup ve sübût-ı vekâlete hükmolunan Ahmed Beşe b. Osman meclis-i ma‘kūd-ı mezbûrda müteveffâ-yı mezbûrun terekesine bi’l-verâse vaz‘-ı yed eden râfi‘ü’l-kitâb mezbûr Mustafa Beşe ve Mehmed Beşe mahzarlarında bi’l-vekâle ikrâr ve takrîr-i kelâm edip müteveffâ-yı mezbûr Mehmed Çavuş ve zevcesi Âişe Hatun’un terekeleri tahrîr olunup ba‘de ihrâci’l-mesârif tashîh-i mezbûr üzere müvekkileme âid olan hakkı para dört akçe hesâbınca defter-i kassâm-ı askerîde tahrîr olunan Mehmed Çavuş’un terekesinden on üç bin yedi yüz kırk üç akçe ve zevcesi mezbûre Âişe Hatun’un terekesinde sekiz bin beş yüz akçe cem‘an yirmi iki bin iki yüz kırk üç akçesi mezbûrân Mustafa Beşe ve Mehmed Beşe yedlerindeden bi’t-tamâm alıp kabz eyledim ve tereke-i müteveffâ-yı mezbûr Mehmed Çavuş’un ve zevcesi mezbûre Âişe Hatun’un terekelerine ve sâire müte‘allıka âmme-i da‘vâdan mezbûr Mehmed Beşe ve Mustafa Beşe’nin zimmetlerini ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû irsâl olunan Çukadâr el-Hâc Süleyman b. Abdullah ve Hüseyin Çelebi b. Mehmed ile meclis-i şer‘a gelip inhâ ve takrîr etmeğin mâ-vaka‘a bi’t-taleb kayd şüd. Fî 10 min-Cumâdelâhire sene 1110. Şuhûdü’l-hâl: Ahmed Çelebi b. Abdullah, İbrahim Çelebi b. Süleyman, Şa‘bân Beşe b. Osman, Mehmed Çelebi b. Receb