Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 793 Hüküm no: 639 Orijinal metin no: [147b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Reis’in Mehmed Ağa’ya olan borcuna kefil olan Mehmed Efendi’nin parayı ödemesi Mahmiye-i İstanbul’da Âşık Paşa mahallesinde sâkin işbu bâ‘isü’l-kitâb el-Hâc Mehmed Ağa b. Veli meclis-i şer‘de mahmiye-i mezbûrede Çupizâde mahallesi İmâmı Mehmed Efendi b. Ömer mahzarında üzerine da‘vâ ve takrîr-i kelâm edip kasaba-i Tophane’de Cihangir mahallesinde sâkin işbu hâzır bi’l-meclis Musa Reis b. Ali zimmetinde cihet-i karzdan altmış guruş hakkım olup bundan akdem meblağ-ı mezbûrun yedi buçuk guruşu mukābelesinde mezbûr Musa’dan iki deste revgan-ı sâde iştirâ ve kabûl ve kabz etmekle zimmetinde kırk iki buçuk guruş hakkım bâkī kalıp meblağ-ı bâkī-yi mezbûru mukaddemâ mezbûrdan taleb ve da‘vâ eyledikde ol dahi ikrâr etmekle edâsına hükm-i şer‘î lâhık oldukdan sonra mezbûr Mehmed Efendi’den suâl olunup tevliyetine binâen meblağ-ı bâkī-yi mezbûru bana edâya tenbîh olunmak matlûbumdur gıbbe’s-suâl mezbûr Mehmed Efendi cevâbında kazıyye vech-i meşrûh üzere olup medyûn-ı mezbûr Musa Bey zimmetinde bâkī kalan meblağ-ı mezbûr kırk iki buçuk guruş hakkına ber-vech-i muharrer kefîl olup min-ciheti’l-kefâle meblağ-ı mezbûr, müdde‘î-i merkūm el-Hâc Mehmed Ağa’ya vâcibü’l-edâ deyni olduğunu ikrâr ve i‘tirâf etmeğin bi-hükmi’l-münâsaha meblağ-ı mezbûr kırk iki buçuk guruşu müdde‘î-i mezbûra edâ ve teslîme kefîl-i mezbûra ba‘de’t-tenbîh mâ-vaka‘a kayd şüd. Fî 7 min-Safer sene 1110. Şuhûdü’l-hâl: İsmail Ağa b. Abdullah, Ali Efendi b. Yusuf, Nasuh Beşe b. (°) çukadâr, Ahmed b. Süleyman