Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 799 Hüküm no: 644 Orijinal metin no: [148b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin vefat eden Abdullah’ın vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Hâfız Mehmed Efendi b. eş-Şeyh Mustafa mahmiye-i İstanbul’da Uzun Şücâ‘ mahallesinde sâkin ve Hâssa tabbâhları ustalarından iken işbu sene-i mübârekede Mekke-i mükerreme -şerrefehallâhu te‘âlâ-dan gelir iken Yenbu‘ nâm mahalde bundan akdem vefât eden el-Hâc Abdullah b. Mesih b. Osman’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i mübîn ettikde müteveffâ-yı mezbûrun verâseti zevce-i menkûha-i metrûkesi Hadîce Hatun bt. Abdullah ile li-ebeveyn ammi oğlu fahrü’l-kuzât Ali Efendi b. Maksud’a münhasıra olduğu şer‘an mütehakkık oldukdan sonra mahalle-i mezbûrede sâkin olup vech-i âtî üzere müteveffâ-yı mezbûrun vasiyy-i muhtârı olduğunu iddi‘â eden bâ‘isü’l-kitâb İbrahim Çelebi b. Halil meclis-i ma‘kūd-ı mezbûrda tereke-i müteveffâ-yı mezbûra vâzı‘u’l-yed olan merkūm Ali Efendi mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Abdullah b. Mesih b. Osman Mekke-i mükerreme’ye gider oldukda bi-emrillâhi te‘âlâ vefât eylediğimde cemî‘ malımın sülüsü ifrâz olunup meblağ-ı müfrez-i mezbûrdan mu‘takam Kahraman bt. Abdullah’a yirmi guruş ve mu‘takım Hasan b. Abdullah’a yirmi guruş verilip ve fazlası eyyâm-ı mu‘tâde-i mübârekede tabh-ı ta‘âma sarf olunup it‘âm-ı fukarâ oluna deyü huzûr-ı Müslimînde vasiyet edip tenfîzine beni vasiyy-i [149a] muhtâr nasb ü ta‘yîn edip ben dahi muvâcehesinde ba‘de’l-kabûl musırran alâ-îsâihî fevt olmağla tenfîz-i vesâyâ murâd eylediğimde mezbûr Ali Efendi mâni‘ olur, suâl olunsun dedikde gıbbe’s-suâl mezbûr Ali Efendi cevâbında tereke-i müteveffâ-yı mezbûra vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı Müslimînden olup mahalle-i mezbûrede sâkin Hasan Efendi b. Mustafa ve Hocapaşa mahallesinde sâkin el-Hâc Mehmed b. Mustafa li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffâ-yı mezbûr el-Hâc Abdullah b. Mesih b. Osman Mekke-i mükerreme’ye gider oldukda bi-emrillâhi te‘âlâ vefât eylediğimde cemî‘ malımın sülüsü ifrâz olunup meblağ-ı müfrez-i mezbûrdan mu‘takam Kahraman bt. Abdullah’a yirmi guruş ve mu‘takım Hasan b. Abdullah’a yirmi guruş verilip ve fazlası eyyâm-ı mu‘tâde-i mübârekede tabh-ı ta‘âma sarf olunup it‘âm-ı fukarâ oluna deyü huzûrumuzda vasiyet edip ve tenfîzine işbu müdde‘î-i mezbûr İbrahim Çelebi’yi vasiyy-i muhtâr nasb ü ta‘yîn edip ol dahi muvâcehesinde ba‘de’l-kabûl musırran-alâ-îsâihî vefât eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr edip ba‘dehû ma‘an ba‘s olunan Hasan b. Abdullah ve Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 13 Cumâdelâhire li-sene 1110 Şuhûdü’l-hâl: el-Hâc Veli b. Ahmed, Ahmed Efendi b. Yusuf, Hasan Çelebi b. Osman, Ali Bey b. Abdurrahman, Mustafa Bey b. Ahmed Hilvanî, el-Hâc İbrahim b. Ebubekir.