Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 801 Hüküm no: 646 Orijinal metin no: [149a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun’un vasiyet edip vasiliğe Süleyman Ağa’yı tayin ettiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mevlânâ es-Seyyid İsmail Efendi b. Ahmed Efendi mahmiye-i İstanbul’da Dülgerzâde mahallesinde sâkin Süleyman Ağa b. Mustafa’nın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde menzil-i mezbûrda sâkine olup zâtı mahalle-i mezbûre ahâlîsinden Salih Efendi b. Mustafa ve mahmiye-i mezbûrede Mustafa Bey’in mahallesinden Ahmed Efendi b. Mehmed ta‘rîfleriyle mu‘arrefe olan Rahime Hatun bt. Resul meclis-i ma‘kūd-ı mezbûrda işbu râfi‘ü’l-kitâb mezbûr Süleyman Ağa mahzarında ikrâr ve takrîr-i kelâm edip ben mezbûr Süleyman Ağa’nın menzilinde âriyeten sâkine olmağla menzil-i mezbûrun dâhilinde ve hâricinde ismi mal ıtlâk olunur eşyâmı âhara seksen guruşa bey‘ ve kabz-ı semen edip meblağ-ı mezbûr seksen guruşdan mâ‘adâ <> mezbûr Süleyman Ağa’ma yetmiş guruş dahi ikrâz ve kabz ve meblağ-ı mezbûra zam edip min-haysü’l-mecmû‘ yüz elli guruşu işbu hâzır bi’l-meclis Rusiyyetü’l-asl açık kaşlı elâ gözlü orta boylu Müslimetü’l-millet Muammer nâm câriyesini gāib ani’l-meclis Ahmed esîrciden iştirâ ve kabz ve def‘-i semen etmekle mülk-i müşterâm olmuşdur mezbûre Muammer ben vefât edinceye değin bana ba‘de’l-hizme fevtimden sonra mezbûre Muammer’i mezbûr Süleyman sâlimen ba‘de’l-müzâyede semen-i misliyle âhara bey‘ ve gayrıdan cihet-i mezbûreden kendüye ….? yetmiş guruşa ahz ve kabûl edip bâkī ne kalırsa vech-i mesnûn üzere levâzım-ı techîz ve tekfînime sarf ve fazlası iskāt-ı salât ve eyyâm-ı mübârekelerde tabh-ı ta‘âm ve it‘âm-ı fukarâ oluna deyü vasiyet ve tenfîzine mezbûr Süleyman’ı vasiyy-i muhtâr nasb eyledim ba‘de’l-yevm dâhil-i beytde ve hâric-i beytde olan cemî‘ eşyâda benim alâka ve medhalim yokdur dedikde mezbûr Süleyman Ağa dahi vasiyet-i mezbûreyi muvâcehesinde kabûl etdiğini mevlânâ-yı mezbûr mahallinde ketb ü tahrîr ba‘dehû ma‘an irsâl [olunan] Hasan Çelebi b. Mehmed ve Abdi b. Mustafa ile meclis-i şer‘de vukū‘u üzere inhâ etmeğin mâ-vaka‘a kayd-şüd. Fî 16 min-Cumâdelâhire sene 1110 Şuhûdü’l-hâl: Mahmud Efendi b. Mehmed, Abdullah Çelebi el-Müezzin, Mehmed Çelebi b. Receb, İshak Çelebi b. Mehmed, Mustafa b. Ali.