Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 803 Hüküm no: 649 Orijinal metin no: [149b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ebubekir Beşe’nin varislerinden Rahime Hatun’un ev hissesini Ayşe Hatun’a sattığı Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Abdullah Efendi b. Mustafa mahmiye-i İstanbul’da Mahmud Paşa kurbünde Serv(?) mahallesinde sâkin Abdurrahman Efendi b. Abdullah’ın sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Karabaş mahallesinde sâkin iken bundan akdem vefât eden Ebubekir Beşe b. Hüseyin’in verâseti zevcesi Âişe Hatun bt. Mahmud ile kebîre kızları Hadîce ve Fâtıma’ya ve kebîr oğlu Ali’ye münhasıra olup kable’l-kısme mezbûre Fâtıma dahi vefât edip verâseti vâlidesi mezbûre Âişe’ye ve li-ebeveyn(?) kız karındaşı mezbûre Hadîce’ye ve diğer karındaşı mezbûr Ali’ye münhasıra olup kable’l-kısme mezbûr Ali dahi vefât edip verâseti vâlidesi mezbûre Âişe’ye ve li-ebeveyn kız [karı]ndaşı mezbûre Hadîce’ye ve zevcesi Rahime Hatun bt. Ali’ye münhasıra ve tashîh meseleleri bi-hükmi’l-münâsaha yedi bin dört yüz seksen sekiz sehmden olmağla sihâm-ı mezbûrenin iki bin dört yüz doksan yedi sehmi üç mertebede mezbûre Âişe’ye ve dört bin yirmi beş sehmi üç mertebede mezbûre Hadîce’ye ve dokuz yüz altmış altı sehmi bir mertebede mezbûre Rahime’ye isâbeti tahakkukundan sonra mezbûre Rahime’nin babası ve husûs-ı âti’l-beyânda ikrâr ve ibrâya vekîl olduğu zâtı ta‘rîf-i şer‘iyye ile ârifân zikr olunan Serv(?) mahallesinde sâkin Mustafa Çelebi b. Musa ve Mustafa Ağa b. Ali şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan Ali Ağa b. Mustafa meclis-i ma‘kūd-ı mezbûrda râfi‘atü’l-kitâb mezbûre Âişe mahzarında bi’l-vekâle ikrâr edip müteveffâ-yı evvel-i mezbûr Ebubekir’in terekesinden olup zikr olunan Karabaş mahallesinde vâki‘ bir tarafdan Ali Çelebi b. Abdurrahim mülkü ve bir tarafdan Yağlıkçı el-Hâc Ali b. Mehmed mülkü ve bir tarafdan Zeyneb Hatun mülkü ve bir tarafdan tarîk-i âmma müntehî tahtânî bir bâb oda ve bir sofayı müştemil mülk menzilden tashîh-i mezbûr üzere müvekkilem mezbûre Rahime’nin hissesine isâbet eden dokuz yüz altmış altı sehm-i şâyi‘ini tarafeynden îcâb ve kabûlü hâvî bey‘-i kat‘î ile dokuz yüz altmış altı akçeye mezbûre Âişe’ye bey‘ u teslîm ve temlîk ol dahi ber-vech-i muharrer iştirâ ve tesellüm [ve] kabz u kabûl edip semeni olan meblağ-ı mezbûr dokuz [yüz] altmış altı akçeden mezbûre Âişe’nin zimmetini ibrâ ve iskāt eyledim ba‘de’l-yevm zikr olunan menzil-i mahdûd-ı mezbûrun dokuz yüz altmış altı sehm-i şâyi‘i mezbûrenin mülk-i müşterâsıdır, keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Abdullah Çelebi b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 14 min-Cumâdelâhire sene 1110 Şuhûdü’l-hâl: Abdurrahim b. Abdullah, Mehmed Efendi b. Abdullah, Hüseyin b. Veli, Osman b. Abdurrahim.