Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 804 Hüküm no: 650 Orijinal metin no: [149b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mustafa Efendi’nin vefat eden İbrahim Efendi’nin vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Şehzâde Medresesi’nde Abdullah Efendi b. Ramazan’ın sâkin olduğu odaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müderrisînden olup medrese-i mezbûre hucurâtının birinde sâkin iken bundan akdem vefât eden İbrahim Efendi b. Mahmud b. Abdullah’ın vech-i âtî vesâyâsını tenfîze vasiyy-i muhtâr olduğu[nu] iddi‘â eden râfi‘ü’l-kitâb eş-Şeyh Mustafa Efendi b. Mustafa meclis-i ma‘kūd-ı mezbûrda müteveffâ-yı mezbûrun zâhirde vâris-i ma‘rûfu olmayıp mecmû‘u terekesi cânib-i beytülmâle âid <> olmak üzere mahmiye-i mezbûrede bi’l-fi‘il beytülmâlü’l-hâssa emîni Mustafa Ağa b. Abdülmennan b. İbrahim tarafından husûs-ı âti’l-beyânda müseccel vekîli olmağla tereke-i müteveffâ-yı mezbûra bi’l-vekâle vaz‘-ı yed ve kıbel-i şer‘den husûmet ve redd-i cevâba me’zûn olan Mehmed Çelebi b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr İbrahim Efendi b. Mahmud b. Abdullah hâl-i marazında fevtinden iki gün mukaddem bi-emrillâhi te‘âlâ fevtimden sonra tesviye-i umûrum görüle ve terekem Vilâyet-i Anadolu’da Kengiri kazâsında sâkinler li-ebeveyn karındaşlarım Mehmed ve Fâtıma’ya îsâl oluna deyü huzûr-ı Müslimînde vasiyet edip tenfîzine gıyâbımda beni vasiyy-i muhtâr ve üzerime işbu hâzırân bi’l-meclis Kasım Efendi b. <> Ali ve Hasan Efendi b. Hüseyin’i nâzır nasb ü ta‘yîn edip musırran alâ-îsâihî fevt olup ben dahi vesâyeti kabûl etmekle terekesini kabz murâd etdiğimde vekîl-i merkūm bi-gayr-ı hakkın vaz‘-ı yed edip bana teslîmden imtinâ‘ eder suâl olunsun dedikde gıbbe’s-suâl vekîl-i mezbûr cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden [150a] ve medrese-i mezbûre sâkinlerinden mezbûr Abdullah Efendi b. Ramazan ve Mustafa Efendi b. İbrahim li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr İbrahim Efendi b. Mahmud b. Abdullah hâl-i marazında fevtinden iki gün mukaddem bi-emrillâhi te‘âlâ fevtimden sonra tesviye-i umûrum görüle ve terekem Vilâyet-i Anadolu’da Kengiri kazâsında sâkinler li-ebeveyn karındaşlarım Mehmed ve Fâtıma’ya îsâl oluna deyü huzûrumuzda [vasiyet] ve tenfîzine müdde‘î-i mezbûru gıyâbında vasiyy-i muhtâr ve üzerine işbu Kasım Efendi b. Ali ve Hasan Efendi b. Hüseyin’i nâzır nasb ü ta‘yîn edip musırran alâ-îsâihî vefât ve müdde‘î-i mezbûr vesâyet-i merkūmeyi kabûl eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm tereke-i müteveffâ-yı mezbûru vasiyy-i mezbûra teslîme vekîl-i mezbûra tenbîh <> eylediğini mevlânâ-yı mezbûr mahallinde tahrîr ve ma‘an irsâl olunan Muhzır İbrahim Çelebi b. Mehmed ve Mehmed b. Hüseyin ile meclis-i şer‘a gelip vukū‘u üzere inhâ ve takrîr etmeğin mâ [va]ka‘a ketb şüd. Fî 25 min-Rebî‘ülevvel sene 1110 Şuhûdü’l-hâl: Hasan Efendi b. Mustafa, Veli Efendi b. Ahmed, Hüseyin Efendi b. Ahmed, Mustafa Efendi b. Mehmed.