Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 809 Hüküm no: 654 Orijinal metin no: [150b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Kahraman’ın hür olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Hâfız Mehmed Efendi mahmiye-i İstanbul’da Uzun Şücâ‘ mahallesinde sâkin hâssa tabbâhları üstâdlarından iken işbu sene-i mübârekede Mekke-i mükerreme -şerrefehallâhu te‘âlâ-dan gelirken Yenbu‘ nâm mahalde bundan akdem vefât eden el-Hâc Abdullah b. Mesih b. Osman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Hadîce Hatun bt. Abdullah ile li-ebeveyn ammi oğlu Ali Efendi b. Maksud’a münhasıra olduğu şer‘an zâhir oldukdan sonra müteveffâ-yı mezbûra hayâtında zâtı mu‘arrefe ve ber-vech-i âtî da‘vâya kıbel-i şer‘den me’zûne olan işbu orta boylu açık kaşlı elâ gözlü gözünün sağ tarafı nişânlı Rusiyyetü’l-asl Müslimetü’l-millet müseccelü’l-kitâb Kahraman bt. Abdullah meclis-i ma‘kūd-ı mezbûrda müteveffâ-yı mezbûrun terekesinden rıkk olmak üzere kendüye vaz‘-ı yed eden mezbûr Ali Efendi mahzarında üzerine da‘vâ ve takrîr-i kelâm edip seyyidim müteveffâ-yı mezbûr el-Hâc Abdullah b. Mesih b. Osman hâl-i sıhhatinde bin yüz dokuz senesi Receb-i şerîfinde Mekke-i mükerreme’ye gider olduğu hâlde câriye-i memlûkesi olduğum hâlde benim içün câriye-i memlûkem Kahraman yevm-i fevtimden kırk gün mukaddem hasbeten lillâhi te‘âlâ malımdan âzâd olsun deyü huzûr-ı Müslimînde beni tedbîr-i mukayyed ile müdebbere edip ba‘dehû yedi ay mürûrundan sonra fevt olmağla ben cemî‘ malımdan sâir harâir-i asliyât gibi hürre olmuşken mezbûr Ali Efendi bana rıkk olmak üzere bi-gayr-ı hakkın vaz‘-ı yed murâd eder suâl olunup sebîlim tahliye olunmak matlûbumdur dedikde gıbbe’s-suâl ve akībe’l-inkâr mevsûfe-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden olup mahalle-i mezbûrede sâkin Hasan Efendi b. Mustafa ve Hocapaşa mahallesinde sâkin el-Hâc Mehmed Ağa b. Mustafa li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr el-Hâc Abdullah b. Mesih b. Osman hâl-i sıhhatinde târîh-i merkūmda Mekke-i mükerreme’ye gider oldukda mevsûfe-i mezbûre içün câriye-i memlûkem Kahraman yevm-i fevtimde kırk gün [mukaddem] hasbeten lillâhi te‘âlâ malımdan âzâd olsun deyü huzûrumuzda mevsûfe-i mezbûreyi tedbîr-i mukayyed ile müdebbere edip ba‘dehû yedi ay mürûrundan sonra fevt olup mevsûfe-i mezbûre sâir harâir-i asliyât gibi hürre olmuşdur biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hasan b. Abdullah ve Mustafa b. Mehmed ile meclis-i şer‘a gelip inhâ ve takrîr etmeğin mâ-vaka‘a bi’t-taleb kayd-şüd. Fî 13 min-Cumâdelâhire sene 1110 Şuhûdü’l-hâl: Ahmed Efendi b. Yusuf, İbrahim Çelebi b. Halil, Hasan Çelebi b. Osman, Hacı Veli b. Ahmed, Ali Beşe Bey b. Abdurrahim, Mustafa Çelebi b. Ahmed.