Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 811 Hüküm no: 656 Orijinal metin no: [151a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun vefat eden kocasından olan miras hissesini vasisinden teslim aldığı Husûs-ı âti’l-beyânın mahallinde ketb ü tahrîr ve istimâ‘ı içün bi’l-iltimâs savb-ı şer‘den me’zûnen Mevlânâ Mehmed Efendi b. Veliyüddin irsâl olunup ol dahi mahmiye-i İstanbul’da Beyceğiz mahallesinde sâkin iken bundan akdem vefât eden Mustafa Çelebi b. Murtaza b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Âişe Hatun bt. Mehmed ile sulbî sagīr oğulları Mehmed ve Hüseyin’e münhasıra olup tashîh meselesi on altı sehmden olup sihâm-ı mezbûrun iki sehmi mezbûre Âişe Hatun’a ve bâkī yedişer sehmi sagīrân-ı mezbûrânın herbirine isâbet eylediği şer‘an zâhir ve mütehakkık oldukdan sonra zâtı ta‘rîf-i şer‘î ile mu‘arrefe olan mezbûre Âişe Hatun meclis-i ma‘kūd-ı mezbûrda müteveffâ-yı mezbûrun terekesine bi’l-vesâye vaz‘-ı yed eden işbu hâfizü’l-kitâb Muslu Çelebi b. Resul mahzarında ikrâr-ı tâm ve takrîr-i kelâm edip zevcim müteveffâ-yı mezbûrun terekesi tahrîr ve ber-mûceb-i defter-i kassâm-ı askerî ve tashîh-i mezbûr üzere hisseme isâbet eden para üçer akçe hesâbı üzere on bir bin üç yüz otuz akçe hisse-i irsiyemi terekeden olmak üzere vasiyy-i mezbûr yedinden tamâmen alıp kabz eyledim ba‘de’l-yevm tereke-i müteveffâ-yı mezbûrdan hisseme isâbet eden mîrâs da‘vâsından vasiyy-i mezbûrun zimmetini ibrâ-i âmm-ı katı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ba‘dehû ma‘an ba‘s olunan Hasan Çelebi b. Abdullah ve İbrahim b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Hurrire fî 15 min-Cumâdelâhir sene 1110 Şuhûdü’l-hâl: Hüseyin Efendi b. Mustafa, Hasan Beşe b. Abdullah, Müezzin Ali Efendi b. Şa‘bân, Ahmed Çelebi b. Hüseyin ve gayruhum.