Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 812 Hüküm no: 657 Orijinal metin no: [151a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muslu Çelebi’nin vefat eden Mustafa Çelebi’nin vasisi olduğunu ispat ettiği Husûs-ı âti’l-beyânın mahallinde ketb ü tahrîr ve istimâ‘ı içün savb-ı şer‘den me’zûnen Mevlânâ Mehmed Efendi b. Veliyüddin irsâl olunup ol dahi mahmiye-i İstanbul’da Beyceğiz mahallesi imâmı Hüseyin Efendi b. Mustafa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde zikr olunan Beyceğiz mahallesinde sâkin iken bundan akdem vefât eden Mustafa Çelebi b. Murtaza b. Abdullah’ın vech-i âtî üzere vasiyy-i muhtârı olduğunu iddi‘â eden li-ümmin karındaşı işbu sâhibü’l-kitâb Muslu Çelebi b. Resul meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi olup terekesine bi’l-verâse vaz‘-ı yed eden Âişe Hatun bt. Mehmed mahzarında üzerine da‘vâ ve takrîr-i kelâm edip müteveffâ-yı mezbûr Mustafa b. Murtaza b. Abdullah hasta ve alîl olduğu hâlde mübtelâ olduğum marazdan bi-emrillâhi te‘âlâ fevt olduğumda cemî‘ terekemden vech-i mesnûn üzere levâzım-ı techîz ve tekfînim görüle [151b] ve zimem-i nâsda olan hukūkum ahz oluna ve düyûn-ı müsbetem kazâ oluna ve bâkī terekemden dahi zevcem mezbûre Âişe Hatun’un sümün hissesi verildikden sonra bâkī kalan terekem sagīr oğullarım Mehmed ve Hüseyin içün senin yedinde hıfz oluna deyü vasiyet edip tenfîzine huzûr-ı Müslimînde beni vasiyy-i muhtâr nasb ü ta‘yîn ettikde ben dahi muvâcehesinde ba‘de’l-kabûl ve musırran-aleyhâ vefât etmekle mezbûre Âişe Hatun’un yedinde olan terekesinin seb‘a-i esmânını bi’l-vesâye taleb ederim suâl olunsun dedikde gıbbe’s-suâl mezbûre Âişe Hatun cevâbında terekesine vaz‘-ı yedini ikrâr ve müdde‘î-i mezbûrun vech-i muharrer üzere müdde‘âsını inkâr edicek müdde‘î-i merkūmdan sıdk-ı makāline beyyine taleb olundukda udûl-ı ahrâr-ı ricâl-i Müslimînden olup kasaba-i Kasımpaşa’da Kulaksız mahallesi ahâlîsinden <> Memiş Çelebi b. Ahmed ve el-Hâc Ali b. Hüseyin li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffâ-yı mezbûr Mustafa Çelebi b. Murtaza b. Abdullah hasta ve alîl olduğu hâlde mübtelâ olduğum marazdan bi-emrillâhi te‘âlâ fevt olduğumda cemî‘ terekemden vech-i mesnûn üzere levâzım-ı techîz ve tekfînim görüle ve zimem-i nâsda olan hukūkum ahz oluna ve düyûn-ı müsbetem kazâ oluna ve bâkī terekemden zevcem mezbûre Âişe Hatun’un sümün hissesi verildikden sonra bâkī kalan terekem sagīr oğullarım Mehmed ve Hüseyin içün işbu müdde‘î-i merkūmun yedinde hıfz oluna deyü vasiyet edip tenfîzine huzûrumuzda müdde‘î-i mezbûr Muslu Çelebi’yi vasiyy-i muhtâr nasb ü ta‘yîn ettikde ol dahi muvâcehesinde kabûl edip ve musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hasan Çelebi b. Abdullah ve İbrahim Çelebi b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Hurrire fî 15 min-Cumâdelâhir sene 1110 Şuhûdü’l-hâl: Hasan Beşe b. Abdullah, Müezzin Ali b. Şa‘bân, Ahmed Çelebi b. Hüseyin, Mehmed b. Ali, Mustafa Çelebi b. Ahmed ve gayruhum.