Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 813 Hüküm no: 658 Orijinal metin no: [151b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İsmihan Hatun’un terekesinin eşi ve beytülmâl arasındaki taksimi Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Voynuk Şücâ‘ mahallesinde sâkin Kundakçı Hüseyin Çelebi b. Ahmed mahzarında(?) akd-i meclis-i şer‘-i şerîf ettikde menzil-i mezbûrda sâkin iken bundan akdem vefât eden İsmihan Hatun bt. Abdullah’ın zâhirde zevc-i metrûku mezbûr Hüseyin Çelebi’den gayrı vâris-i ma‘rûfu olmamağın terekesinin nısfı mezbûra ve nısf-ı âharı cânib-i beytülmâle âid oldukdan sonra mahmiye-i mezbûrede beytülmâl-i hâssa emîni Mustafa Ağa b. Abdülmennan tarafından müseccel vekîli Mehmed b. Mustafa meclis-i mezbûrda tereke-i müteveffâ-yı mezbûra vâzı‘u’l-yed olan mezbûr Hüseyin mahzarında ikrâr edip müteveffâ-yı mezbûrun terekesi tahrîr ve defter olunup mecmû‘-ı terekesi zevci mezbûr Hüseyin Çelebi’nin zimmetinde sâbit ve ma‘kūdun-aleyh iken sağ akçe ile altı bin seksen akçeye bâliğ olup meblağ-ı mezbûrun altı yüz akçesi defter-i mezbûrda tasrîh olunduğu üzere mesârif-i mu‘tâdesi(?) ba‘de’l-ihrâc bâkī beş bin dokuz yüz(?) sağ akçenin nısfı olup cânib-i beytülmâle âid olan iki bin dokuz [yüz] elli altı sağ akçesi mezbûr [yed]inden vekâleten kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Mehmed b. Hasan ve Mustafa b. Mehmed ile meclis-i şer‘de takrîr-şüd. Fî 19 min-Cumâdelâhire sene 1110 Şuhûdü’l-hâl: Hüseyin Efendi b. Abdurrahim, Mahmud Beşe Yiğitbaşı, Yusuf b. Abdullah, İbrahim b. İbrahim.