Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 815 Hüküm no: 660 Orijinal metin no: [152a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Naib Mehmed Efendi’nin varislerinin miras davasında zimmet ibraları Husûs-ı âti’l-beyânın mahallinde ketb ü tahrîri iltimâs olunmağın cânib-i şer‘-i şerîfden Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Şeyh Resmi mahallesinde Emine bt. Hüseyin nâm hatunun ücret ile sâkine olduğu menzile varıp zeyl-i vesîkada isimleri mastûr Müslimîn huzûrlarında akd-i meclis-i şer‘-i âlî ettikde mahalle-i mezbûre ahâlîsinden olup Vilâyet-i Rumeli’nde Karasu Yenicesi kazâsı nâibi iken bundan akdem vefât eden Mehmed Efendi b. Ahmed’in verâseti zevce-i menkûha-i metrûkesi mezbûre Emine Hatun ile vâlidesi Sâkine bt. el-Hâc Receb’e ve sagīr oğlu Abdullah’a münhasıra ve tashîh meselesi yirmi dört sehmden olmağla sihâm-ı mezbûrenin üç sehmi zevcesi mezbûre Emine’ye ve dört sehmi vâlidesi merkūme Sâkine’ye ve bâkī on yedi sehmi sagīr-i mezbûra isâbeti tahakkukundan sonra zâtı mahalle-i mezbûre sükkânından Hüseyin Çelebi b. Receb ve Halil Çelebi b. ( ) ta‘rîfleriyle mu‘arrefe olan mezbûre Sâkine Hatun meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi ve sagīr-i mezbûrun tesviye-i umûruna kıbel-i şer‘den mansûbe vasiyesi olmağla terekesine vaz‘-ı yed eden hâfizatü’l-kitâb mezbûre Emine Hatun mahzarında ikrâr ve takrîr-i kelâm edip oğlum müteveffâ-yı mezbûrun terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm-ı askerî para üç akçeden olmak üzere taksîm içün bâkī kalan otuz üç bin yüz yirmi beş akçeden tashîh-i mezbûr üzere südüs hisseye isâbet eden beş bin beş yüz yirmi sağ akçeyi terekeden olmak üzere mezbûre Emine Hatun yedinden bi’t-tamâm ve’l-kemâl ahz u kabz eyledim ba‘de’l-yevm müteveffâ-yı mezbûrun zimem-i nâsda olan hukūkundan mâ‘adâ terekesine ve mezbûre Emine’ye oğlum müteveffâ-yı mezbûrun hîbe eylediği Lütfi nâm câriyeye müte‘allık olup hisseme isâbet eden mîrâs da‘vâsından mezbûre Emine Hatun’un zimmetini ibrâ-i âmm-ı katı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Çelebi b. Süleyman ve Mehmed Çelebi b. Hüseyin ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 22 Cumâdelâhire sene 1110 Şuhûdü’l-hâl: Ali Efendi b. ( ), Molla Ahmed [b.] Şahin, Mustafa Çelebi b. Osman, el-Hâc Yusuf b. Abdullah, Mehmed Çelebi b. Abdullah.