Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 824 Hüküm no: 671 Orijinal metin no: [153M/b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liko Reis’in vefat eden Attar Mustafa’ya olan borcunu ödemesi Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen irsâl olunan Mevlânâ Ahmed Efendi b. İsmail Efendi mahmiye-i İstanbul’da Yeni Câmi‘ kurbünde Attârlar sûkunda İbrahim Çelebi b. Mustafa’nın menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i şerîf ettikde mahmiye-i mezbûrede el-Hâc Hasan mahallesi sâkinlerinden iken bundan akdem vefât eden Attâr el-Hâc Mustafa b. Mahmud b. Hüseyin’in sulbiye sagīre kızları Hadîce ve Emine ve Safiye’nin bâ-hüccet-i şer‘iyye vasiyy-i mansûbları bâ‘isü’l-kitâb mezbûr İbrahim Çelebi b. Mustafa meclis-i ma‘kūd-ı mezbûrda müteveffâ-yı mezbûr el-Hâc Mustafa’nın medyûnu hasır? firkatecilerinden olup mahmiye-i mezbûre Hasır iskelesinde sâkin Rodoslu Liko v. Nikola nâm zimmî reis mahzarında bi’l-vesâye üzerine da‘vâ ve takrîr-i kelâm edip mezbûr Liko Reis müteveffâ-yı mezbûr el-Hâc Mustafa b. Mahmud b. Hüseyin’den hayâtında işbu temessük mûcebince iki yüz altmış guruş istidâne ve kabz ve mesârifine sarfla istihlâk edip meblağ-ı mezbûru kable’l-istîfâ merkūm el-Hâc Mustafa fevt olup meblağ-ı merkūm mezbûr Liko Reis zimmetinde kalmağla meblağ-ı mezbûru vesâyetim hasebiyle mezbûrdan taleb ederim suâl olunup bana edâya mezbûr Liko Reis’e tenbîh olunmak matlûbumdur dedikde gıbbe’s-suâl mezbûr Liko Reis cevâbında müteveffâ-yı mezbûr el-Hâc Mustafa b. Mahmud b. Hüseyin’den hayâtında yüz kırk guruş olmak üzere yirmi yaldız altını ve kırk şerîfî altın istidâne ve yedinden ahz u kabz eyledim müteveffâ-yı mezbûra zimmetimde vâcibü’l-edâ ancak yüz kırk guruş deynim vardır <> ziyâde bir akçe deynim yokdur deyü vasiyy-i mezbûru müdde‘âsı olan meblağ-ı mezbûr iki yüz altmış guruşun yüz kırk guruşunu ikrâr meblağ-ı bâkī yüz yirmi guruşunu inkâr edicek vasiyy-i mezbûrdan mezbûr Liko Reis’in ikrârı mertebesi olan yüz kırk guruşdan mâ‘adâ ziyâde yüz yirmi guruş müdde‘âsına beyyine taleb olundukda ityân-ı beyyineden izhâr-ı acz ile istihlâf etmeğin mezbûr Liko Reis’e ikrârından mâ‘adâ müteveffâ-yı mezbûra meblağ-ı bâkī-i mezbûr yüz yirmi guruş vechen mine’l-vücûh zimmetimde vâcibü’l-edâ deyn olmayıp üzerine redd-i damân lâzım olmadığına yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebiyle mezbûr Liko Reis’e ikrâr eylediği mezbûr yüz kırk guruşu vasiyy-i mezbûra teslîme ba‘de’l-hükm ve’t-tenbîh vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Mustafa b. Abdullah ve Süleyman Çelebi b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 7 min-Safer sene 1110 Şuhûdü’l-hâl: Osman Ağa b. Mehmed, el-Hâc Abdülkerim b. Cafer, Mehmed b. Hızır, Hasan Çelebi b. Hasan, Hüseyin Çelebi b. Abdullah.