Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 823 Hüküm no: 670 Orijinal metin no: [153M/b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin vefat eden Mehmed’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘den bi’t-taleb irsâl olunan Mevlânâ Ahmed Efendi b. el-merhûm Mehmed Efendi mahmiye-i İstanbul’da Samanveren mahallesi ahâlîsinden olup bundan akdem merhûm el-Hâc Mehmed b. el-Hâc Mahmud’un Vâlide Câmi‘i kurbünde odasına varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Avratpazarı kurbünde Hobyar mahallesinde sâkin fahrü’l-a‘yân bâ‘isü’l-kitâb Mehmed Efendi [b.] Ahmed meclis-i ma‘kūd-ı mezbûrda müteveffâ-yı mezbûrun evlâd-ı sıgārı Mehmed ve Mustafa ve Râziye ve Hadîce’nin tesviye-i umûruna vasiyy-i muhtârı olmağla terekesine vaz‘-ı yed eden el-Hâc Ahmed b. Mehmed mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mehmed b. el-Hâc Mahmud b. Mehmed zimmetinde işbu mümzâ ve mahtûm bin yüz sekiz senesi Rebî‘ulûlâ târîhiyle müverrah deyn temessüğü nâtık olduğu üzere altı bin beş yüz guruş ve hâric ez temessük bin guruş cem‘an cihet-i deyn-i şer‘îden yedi bin beş yüz guruş hakkım olup hattâ müteveffâ-yı mezbûr hâl-i marazında fevtinden üç gün mukaddem cihet-i mezbûreden zimmetinde bana ol kadar guruş deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden zikr olunan Samanveren mahallesi sükkânından Süleyman Çelebi b. Sinan ve Mahmud Hoca b. Abdurrahim ve müteveffâ-yı mezbûrun kebîr oğlu Ali li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed b. el-Hâc Mahmud b. Mehmed hâl-i marazında müdde‘î-i mezbûr Mehmed Efendi’ye cihet-i deyn-i şer‘îden zimmetimde yedi bin beş yüz guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Ahmed Çelebi b. Süleyman ve Mehmed b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 17 min-Cumâdelâhire sene 1110 Şuhûdü’l-hâl: Mehmed Efendi b. Abdulkadir, el-Hâc Mehmed b. Ahmed, Ali Çelebi b. Mustafa, Ahmed Çelebi b. Abdullah, Ahmed Çelebi b. Süleyman.