Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 829 Hüküm no: 673 Orijinal metin no: [153b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nebi Efendi’den kızına intikal eden nısf dükkânın satışına izin verildiği Mahmiye-i İstanbul’da Soğan Ağa mahallesinde sâkin iken bundan akdem vefât eden Nebi Efendi b. Hızır’ın sagīre kızı Fâtıma’nın tesviye-i umûruna vasiyy-i şer‘îsi olan Mustafa Ağa b. İbrahim meclis-i şer‘de takrîr-i kelâm edip sagīre-i mezbûreye babası müteveffâ-yı mezbûrdan intikāl-i âdî ile intikāl edip Bezzâzistân kurbünde vâki‘ Ayasofya-i Kebîr vakfından nısf haffâf dükkânı ânen fe-ânen harâba müşrif olup hâsılı harcına vefâ etmemekle bedel-i misli ve ma‘rifet-i mütevellî ile âhara ferâğ olunup bedeli istirbâh olunmak sagīre-i mezbûre hakkında nef‘-i mahz olmağla zikr olunan nısf dükkânı âhara ferâğa kıbel-i şer‘den me’zûn olmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i vesîkada muharrerü’l-esâmî Müslimîn ihbârıyla lede’ş-şer‘i’ş-şerîf zâhir olmağla hâkim-i muvakkı‘-i sadr-ı kitâb tûbâ-lehû ve hüsnü-meâb hazretleri zikr olunan nısf dükkânı ma‘rifet-i mütevellî ve bedel-i misli ile âhara ferâğa vasiyy-i mezbûra izin vermeğin mâ-vaka‘a ketb şüd. Fî 26 Cumâdelâhire sene 1110 Şuhûdü’l-hâl: Mehmed Çelebi b. Abdullah, el-Hâc İbrahim b. Ali, Abdullah Çelebi b. Hüseyin, Hamza Çelebi b. Abdullah.