Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 830 Hüküm no: 674 Orijinal metin no: [153b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Cafer Efendi’nin çocuklarına Murad Efendi’nin vasi tayin edildiği Mahmiye-i İstanbul’da Mollagürânî mahallesinde sâkin iken bundan akdem vedâ‘-ı âlem-i fânî eden merhûm ve mağfûr nakībü’l-eşrâf es-Seyyid Cafer Efendi b. es-Seyyid Kemâleddin’in sagīr oğlu es-Seyyid Ahmed Çelebi ve sagīre kızı Şerife Saliha’nın tesviye-i umûrlarına cânib-i şer‘den bir vasî nasb ü ta‘yîn olunmak lâzım ve mühim olmağın emânet ile ma‘rûf ve diyânet ile mevsûf müstakīm ve dîndâr ve afîf ve perhizkâr olup her vechile vesâyet uhdesinden gelmeğe kādir olduğu lede’ş-şer‘i’l-enver zâhir ve mukarrer olan sagīrânın mezbûrânın enişteleri umdetü’l-müderrisîni’l-kirâm işbu râfi‘ü’l-kitâbi’l-müstetâb Murad Efendi b. Ali Efendi’yi hâkim-i muvakkı‘-i sadr-ı kitâb efendi hazretleri sagīrân-ı merkūmânın vakt-i rüşd ü sedâdlarına değin tesviye-i umûrları içün vasî nasb ü ta‘yîn etdiklerinde mûmâ-ileyh Murad Efendi dahi vesâyet-i mezbûreyi kabûl ve merâsimini edâya müte‘ahhid olmağın mâ-vaka‘a kayd-şüd. Fî âhiri Rebî‘ülâhir sene 1110 Şuhûdü’l-hâl: Umdetü’l-mevâli’l-izâm sâbıkā İzmir kādısı es-Seyyid Mehmed Efendi, Fahrü’l-müderrisîni’l-kirâm Abdullah Efendi, İbrahim Çelebi b. Ahmed, Osman Efendi b. Mehmed.