Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 836 Hüküm no: 680 Orijinal metin no: [155a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Ali Bey’den kızı Saliha’ya intikal eden menzilin satışına izin verildiği Mahmiye-i İstanbul’da Küçük Ayasofya mahallesinde sâkin iken bundan akdem vefât eden Ali Bey b. Abdurrahman’ın sagīre kızı Saliha’nın tesviye-i umûruna kıbel-i şer‘den mansûb vasîsi Derviş Çelebi b. Ali meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip sagīre-i mezbûreye babası müteveffâ-yı mezbûrdan intikāl-i âdî ile intikāl edip mahalle-i mezbûrede vâki‘ lede’l-ahâlî ma‘lûmü’l-hudûd Kasabbaşı Süleyman Ağa Vakfı’ndan yevmî iki akçe icâreli vakıf menzil ânen fe-ânen harâba müşrif olup hâsılı harcına vefâ etmemekle bedel-i misli ve ma‘rifet-i mütevellî ile âhara ferâğ olup bedeli istirbâh olunmak hakkında nef‘-i mahz olmağla menzil-i mezbûru bedel-i misli ile âhara ferâğa kıbel-i şer‘den me’zûn olmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’ş-şerîf zâhir olmağla hâkim-i muvakkı‘-i sadr-ı kitâb hazretleri vech-i muharrer üzere menzil-i mezbûru ma‘rifet-i mütevellî ve bedel-i misli ile âhara ferâğa vasiyy-i mezbûra izin vermeğin mâ-vaka‘a kayd-şüd. Fî selh-i min-Cumâdelâhire sene 1110 Şuhûdü’l-hâl: İbrahim Efendi b. Oruc, Hasan Efendi b. Mustafa, Osman Çelebi b. Ahmed, Mehmed Çelebi b. ( ) el-Müezzin, Mustafa Efendi b. Şa‘bân.