Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 835 Hüküm no: 679 Orijinal metin no: [155a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Râbia Hatun’un anne ve babasının miras hisselerini vasiden teslim alıp zimmetini ibra ettikleri Husûs-ı âti’l-beyânın mahallinde ketb ü tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ el-Hâc Abdurrahman Efendi b. Mustafa mahmiye-i İstanbul’da Demirkapı kurbünde Dâye Hatun mahallesinde sâkine iken bundan akdem vefât eden Râbia Hatun bt. Yusuf’un menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin verâseti zevc-i metrûku fahrü’l-eimme Abdullah Efendi b. Ali’ye ve babası mezbûr Yusuf b. Abdullah’a ve vâlidesi Âişe Hatun bt. Mehmed’e ve sagīr oğulları Abdullah ve Mehmed’e münhasıra ve tashîh meselesi yirmi dört sehmden olmağla sihâm-ı mezbûrenin altı sehmi zevci mezbûr Abdullah Efendi’ye ve dört sehmi babası mezbûr Yusuf’a ve dört sehmi dahi vâlidesi mezbûre Âişe’ye ve bâkī on sehmin beşer sehmi oğulları sagīrân-ı mezbûrândan herbirine isâbeti tahakkukundan sonra mezbûr Yusuf b. Abdullah asâleten ve zevcesi mezbûre Âişe Hatun bt. Mehmed b. Abdullah tarafından hüccet-i şer‘iyye ile vekîli olmağla vekâleten meclis-i ma‘kūd-ı mezbûre[de] tereke-i müteveffât-ı mezbûreye bi’l-verâse ve sagīrlerin tesviye-i emrlerine kıbel-i şer‘den mansûb vasîleri olmağla bi’l-vesâye vaz‘-ı yed eden işbu bâ‘isü’l-kitâb mezbûr İmâm Abdullah Efendi mahzarında ikrâr ve takrîr-i kelâm edip kızım müteveffât-ı mezbûrenin terekesi tahrîr ve ba‘de ihrâci’l-mesârif ber-mûceb-i defter-i kassâm-ı askerî tashîh-i mezkûr üzere benim ve vekîli olduğum zevcem mezbûre Âişe Hatun’un südüs hisselerimize isâbet eden her para dört akçe hesâbı üzere on birer bin beşer yüz seksen beşer akçe hissemizi terekeden olmak üzere mezbûr İmâm Abdullah Efendi yedinden asâleten ve vekâleten tamâmen ahz u kabz eyledim ba‘de’l-yevm meblağ-ı mezbûrlardan mezbûr Abdullah Efendi zimmetinde bir akçe bâkī kalmayıp dâhil-i defter ve hâric ez defter kalîl ü kesîr ve celîl ü hakīr terekeden hissemize isâbet eden cemî‘ mîrâs ve câriye da‘vâlarından mezbûr Abdullah Efendi ile sagīrân-ı mezbûrânın zimmetlerini bi’l-asâle ve bi’l-vekâle ibrâ-i âmm-ı katı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Ahmed ve Mehmed b. Ali ile meclis-i şer‘a gelip alâ-vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fî 25 min-Cumâdelâhire sene 1110 Şuhûdü’l-hâl: Fahrü’l-akrân Mehmed Ağa b. Hasan, Ahmed Halîfe b. Abdulkadir el-Müezzin, Ali Ağa b. el-Hâc Yusuf, Fahrü’s-sâdât es-Seyyid Süleyman Efendi b. Mustafa, Mehmed Bey b. Ali, Abdurrahman Çelebi b. Murad.