Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 838 Hüküm no: 682 Orijinal metin no: [155b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Râbia Hatun’un çocuklarına vasi ve nafaka tayini Mahmiye-i İstanbul’da Demirkapı kurbünde Dâye Hatun mahallesinde sâkine iken bundan akdem vefât eden Râbia Hatun bt. Yusuf’un sagīr oğulları Abdullah ve Mehmed’in tesviye-i emrlerine kıbel-i şer‘-i enverden bir vasî nasbı lâzım ve mühim olmağın emânet ve diyânet ile ma‘rûf ve mevsûf olup mahmûdü’l-hâl olduğu zeyl-i vesîkada muharrerü’l-esâmî bî-garaz Müslimîn haberleriyle lede’ş-şer‘i’ş-şerîf zâhir olan sagīrân-ı mezbûrânın babaları ve velîleri olup mahalle-i mezbûre ahâlîsinden fahrü’l-eimme hâfizü’l-kitâb Abdullah Efendi b. Ali’yi hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri tesviye-i umûr-ı sagīreyn-i mezbûreyne vakt-i rüşd ü sedâdlarına varınca vasî nasb ü ta‘yîn buyurduklarında ol dahi vesâyet-i mezkûreyi kabûl ve hizmet-i lâzımesini kemâ-yenbağī edâya müte‘ahhid oldukdan sonra vasiyy-i mezbûr Abdullah Efendi mahfil-i kazâda bi’l-vesâye takrîr-i kelâm edip oğullarım sagīrân-ı mezbûrânın nafaka ve kisveye ihtiyâçları olmağla vâlideleri müteveffât-ı mezbûreden müntakil mallarından herbirine kadr-ı kifâye nafaka ve kisve-bahâ farz ve takdîr olunmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka olmağın hâkim-i müşârün-ileyh efendi hazretleri mal-ı müntakil-i sagīr-i mezbûrlardan târîh-i kitâbdan herbirine yevmî beşer akçe nafaka ve kisve-bahâ farz ve takdîr buyurup meblağ-ı mefrûz-ı mezkûrları levâzım-ı sagīr-i mezbûrlara harc ü sarfa ve inde’z-zarûre istidâneye ve lede’z-zafer mallarına rücû‘a vasiyy-i mezbûra izin vermeğin mâ-vaka‘a kayd-şüd. Fî 15 min-Cumâdelâhire sene 1110 Şuhûdü’l-hâl: Fahrü’s-sâdâti’l-kirâm es-Seyyid Süleyman Efendi b. es-Seyyid Mustafa Efendi, Fahrü’l-akrân Mehmed Ağa b. Hasan, Müezzin Ahmed Halîfe b. Abdulkadir, Ali Ağa b. el-Hâc Yusuf, Mehmed Bey b. Ali, Yusuf Bey b. Abdullah.