Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 839 Hüküm no: 683 Orijinal metin no: [155b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Sâre Hatun’un varislerinin zimmet ibraları Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘den me’zûnen irsâl olunan Mevlânâ Ahmed Şemsi Efendi b. Mehmed Emin Efendi mahmiye-i İstanbul’da Kuyumcu Bahşayiş mahallesinde sâkine iken bundan akdem vefât eden Sâre Hatun bt. Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin verâseti zevc-i metrûku Hüseyin Ağa b. Osman ile vâlidesi Safiye Hatun bt. Abdullah’a ve li-ümmin kebîr er karındaşları Mehmed ve Mustafa ve li-ümmin sagīr karındaşları Ahmed ve Ömer ve sagīre kız karındaşı Âmine’ye münhasıra oldukdan sonra zevc-i mezbûr Hüseyin Ağa b. Osman meclis-i ma‘kūd-ı mezbûrda müteveffât-ı mezbûrenin kebîr er karındaşları Mehmed ve Mustafa ile zikr olunan sagīrlerin vasiyy-i mansûbları el-Hâc İsmail b. Osman mahzarlarında ikrâr ve takrîr-i kelâm edip müteveffât-ı mezbûrenin terekesi tahrîr ve ba‘de ihrâci’l-mesârif defter-i kassâm-ı askerî nâtık olduğu üzere nısf hisseme isâbet eden otuz altı bin beş yü[z] altmış dört akçeyi tereke-i müteveffât-ı mezbûreden olmak üzere vasiyy-i mezbûr el-Hâc İsmail b. Osman yedinden bi’t-tamâm ve’l-kemâl ahz u kabz eyleyip ba‘de’l-yevm tereke-i müteveffât-ı mezbûreye müte‘allıka âmme-i de‘âvîden verese-i mezkûrînin zimmetlerini ibrâ-i âmm-ı katı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Çukadâr el-Hâc Süleyman ve Muhzır Hüseyin ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 2 min-Cumâdelûlâ sene 1110 Şuhûdü’l-hâl: Mustafa Ağa b. Ahmed, Ali Ağa b. Şa‘bân, Abdullah Ağa b. Osman, İsmail Ağa b. Ahmed, İbrahim Ağa b. Ahmed, Ebubekir Ağa b. Osman ve gayruhum.