Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 842 Hüküm no: 687 Orijinal metin no: [156a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mahmud’un küçük oğlunun vasisi kardeşi Mustafa Çelebi’nin vesayet malından kalan borcunu ödemeyi taahhüt ettiği Mahmiye-i İstanbul’da Kalenderhane mahallesinde sâkin iken bundan akdem vefât eden el-Hâc Mahmud b. Hüseyin’in sulbî sagīr oğlu Abdürrezzak’ın tesviye-i umûruna vasiyy-i muhtârı li-ebin karındaşı es-Seyyid Mustafa Çelebi meclis-i şer‘-i hatîr-ı lâzımü’t-tevkīrde sagīr-i mezbûrun vâlidesi ve vasiyy-i mezbûrun üzerine nâzıra-i hasbiyesi olan bâ‘isetü’l-kitâb Afife Hatun bt. Abdulkadir mahzarında ikrâr ve takrîr-i kelâm edip işbu bin doksan sekiz senesi Şa‘bâni’l-mu‘azzamı’nın yedinci günü ile müverrah mahmiye-i mezbûrede Kassâm-ı askerî Emir Ağazâde es-Seyyid Mehmed Efendi’nin imzâlı hücceti mûcebince sagīr-i mezbûrun [156b] mal-ı müntakilinden dört yüz altmış sekiz guruşunu ahz u kabz edip elân zimmetimde olmağla meblağ-ı mezbûrun on beş guruşunu muhterik dükkân meremmetine ve on guruşunu sagīr-i mezbûrun hitânı mesârifine sarf edip ve altı guruşunu sagīr-i mezbûra îdiye verip ve üç guruşunu Bezzâzistân müstahfızlarına ücret-i sandık verip bâkī kalan yalnız dört yüz otuz dört guruşun yüz on beş guruşu Mahmud Çelebi’ye ve altmış guruşu Havva Hatun’a ve yirmi beş guruşu Afife Hatun’a ve yirmi guruşu el-Hâc Ahmed’e rihân-ı makbûza ile zimem edip ve yüz on dört guruşu Bezzâzistân’da sandıkda mevcûd olup bâkī seksen guruşu mesârifime sarfla istihlâk edip âcilen edâya iktidârım olmamağla târîh-i kitâbdan her ayda ikişer guruş vermeğe ta‘ahhüd eyledim dedikde gıbbe’t-tasdîkı’ş-şer‘î mâ-vaka‘a bi’t-taleb kayd-şüd. Fî gurreti Recebi’l-ferd sene 1110 Şuhûdü’l-hâl: Mukayyid Mustafa Efendi b. Mehmed, Yahya Efendi b. Mustafa, Süleyman Efendi b. Mehmed, Ahmed b. Süleyman, Hasan b. Abdullah.