Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 841 Hüküm no: 686 Orijinal metin no: [156a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Beşe’nin vefat eden diğer Ömer Beşe’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i kavîmden me’zûnen Mevlânâ Uşşâkī Mehmed Efendi irsâl olunup ol dahi mahmiye-i İstanbul’da Debbâğ Yunus mahallesinde sâkin iken bundan akdem Rumeli’nde Varna’da vefât eden Ömer Beşe b. Ebubekir’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i mübîn eyledikde mahalle-i mezbûrede sâkin işbu bâ‘isü’l-kitâb diğer Ömer Beşe b. Osman meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi ve sagīr oğlu Osman’ın tesviye-i umûruna kıbel-i şer‘den mansûbe vasiyesi olmağla terekesine vaz‘-ı yed edip zâtı Mustafa Çelebi b. Ramazan ve Ömer b. Mehmed ta‘rîfleriyle mu‘arrefe olan Rukiye Hatun bt. İbrahim mahzarında üzerine da‘vâ ve takrîr-i kelâm edip müteveffâ-yı mezbûr Ömer Beşe b. Ebubekir b. Abdurrahman hayâtında târîh-i fevtinden iki ay mukaddem Prevadi kasabasında kendi malımdan yirmi beş guruş ikrâz ve teslîm ol dahi iktirâz ve kabz ve mesârifine sarfla istihlâk edip meblağ-ı merkūmu kable’l-edâ fevt olmağla terekesinden taleb ederim suâl olunsun dedikde gıbbe’s-suâl vasiye-i mezbûre cevâbında vech-i muharrer üzere terekesine vaz‘-ı yedini ikrâr ve deyn-i merkūmu inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden zikr olunan Varna tüccârından olup mahalle-i mezbûrede müsâfiren sâkin Yusuf Ağa b. Ali ve İsmail Beşe b. Mehmed nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Ömer Beşe b. Ebubekir b. Abdurrahman hayâtında târîh-i fevtinden iki ay mukaddem zikr olunan Prevadi kasabasında işbu müdde‘î-i mezbûr yedinden bizim huzûrumuzda yirmi beş guruş iktirâz ve kabz ve mesârifine sarfla istihlâk eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hasan Çelebi b. Abdullah ve Ömer b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 29 min-Cumâdelâhire sene 1110 Şuhûdü’l-hâl: Mustafa Çelebi b. Ramazan, İvaz Beşe b. Hasan, Ömer Beşe b. Hamza, Hasan Çelebi b. Abdullah, Mehmed Çelebi b. Yusuf, Hasan Çelebi b. Mustafa.