Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 844 Hüküm no: 690 Orijinal metin no: [156b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mehmed Efendi’nin varislerinin mirastan olan evi İbrahim Ağa’ya sattıkları Husûs-ı âti’l-beyânın mahallinde tahrîri içün savb-ı şer‘-i enverden bi’t-taleb irsâl olunan Mevlânâ Ahmed Efendi b. el-merhûm Mehmed Efendi mahmiye-i İstanbul’da Emin Sinan mahallesinde sâkin iken bundan akdem vefât eden Mehmed Efendi b. el-merhûm Süleyman Efendi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm ettikde müteveffâ-yı mezbûrun verâseti zevce-i menkûha-i metrûkesi Fâtıma Hatun bt. el-merhûm Yakub Efendi ile li-ebeveyn ammi Abdullah Ağa b. İbrahim’e münhasıra olup lâkin merhûm-ı mezbûr cemî‘ terekesinin sülüsünü vücûh-ı birr-i mu‘ayyeneye vasiyet edip tenfîzine Mustafa Efendi b. Halil’i vasiyy-i muhtâr nasb ü ta‘yîn etmekle tashîh meselesi altı sehmden olup sihâm-ı mezbûrenin iki sehmi sülüse ihrâc olundukdan sonra bâkī kalan dört sehmin bir sehmi zevcesi mezbûreye ve bâkī üç sehmi mezbûr Abdullah Ağa’ya isâbeti tahakkukundan sonra vasiyy-i mezbûr Mustafa Efendi ve Abdullah Ağa ile mezbûre Fâtıma Hatun bt. Yakub Efendi b. Mustafa tarafından husûs-ı âti’l-beyânda vekîl olduğu Abdi Çelebi b. Ali ve İbrahim Efendi b. Ahmed şehâdetleriyle mahzar-ı hasm-ı câhidde sâbit olup sübût-ı vekâletine hükmolunan üvey babası Osman Efendi b. Abdullah meclis-i ma‘kūd-ı mezbûrda hâlâ mahrûse-i Edirne’de sâkin el-Hâc İbrahim Ağa b. Receb b. Ahmed tarafından husûs-ı âti’l-beyânda vekîl olduğu İbrahim Bey b. Abdurrahman ve Musa Bey b. Ali şehâdetleriyle mahzar-ı hasm-ı câhidde sâbit olan li-ebeveyn karındaşı Abdurrahman Ağa mahzarında herbiri ikrâr ve takrîr-i kelâm edip müteveffâ-yı mezbûrun [157a] ile’l-vefât mülk ve hakkı olup mahalle-i mezbûrede vâki‘ bir tarafdan es-Seyyid Ahmed Çelebi mülkü ve bir tarafdan el-Hâc İbrahim mülkü ve ba‘zan el-Hâc Ali mülkü ve bir tarafdan tarîk-i hâs ve bir tarafdan tarîk-i âm ile mahdûd dâhiliyesinin tabaka-i ulyâsı bir bâb oda ve bir sofa ve bir kiler ve tabaka-i vustâsı bir bâb oda ve matbah ve tahtında odunluk ve kenîf ve hâriciyesi fevkānî iki bâb oda ve kenîfi müştemil arsasının merhûm Lütfi Bey Vakfı’na beş yüz akçe mukāta‘a-i kadîmesi olup binâsı mülk olan menzil münâdîlerden Yusuf b. Abdullah yediyle sûk-ı sultânîde ve mecma‘-ı nâs olan mevâzi‘de kirâr ü mirâr nidâ ve müzâyede olunup rağabât-ı nâs bi’l-külliye munkatı‘a oldukdan sonra vekîl-i mezbûr Abdurrahman Ağa üzerinde altı yüz otuz guruşda karâr edip ziyâde ile tâlib-i âhar dahi zuhûr etmeyip ve meblağ-ı mezbûr hîn-i akidde mebî‘-i mezkûrun semen-i misli olduğu zeyl-i vesîkada muharrerü’l-esâmî Müslimîn ihbârlarıyla lede’ş-şer‘i’ş-şerîf zâhir olmağla biz dahi menzil-i mahdûd-ı mezbûru bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile vekîl-i mezbûr Abdurrahman Ağa’ya altı yüz otuz guruşa bey‘ u temlîk ve teslîm ol dahi müvekkil-i mezbûrun malıyla müvekkili içün iştirâ ve tesellüm ve kabûl ettikden sonra semeni olan meblağ-ı mezbûru vekîl-i mezbûr yedinden bi-kadri’l-hısâs tamâmen alıp kabz eyledik ba‘de’l-yevm menzil-i mahdûd-ı mezbûr müvekkil-i mezbûrun mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan el-Hâc Süleyman b. Mehmed ve İbrahim b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî gurre-i Recebi’l-ferd sene 1110 Şuhûdü’l-hâl: Ali Efendi b. Ömer, es-Seyyid Ahmed Çelebi b. Mustafa, es-Seyyid Mustafa Efendi b. Resul, İsmail Ağa b. İbrahim, Hüseyin Bey b. Abdullah.