Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 853 Hüküm no: 694 Orijinal metin no: [158a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun müteveffa eşi Derviş’te mehir alacağı olduğunu ispat ettiği Mahmiye-i İstanbul’da Hoca Gıyaseddin mahallesinde sâkinen fevt olan el-Hâc Derviş b. el-Hâc İlyas b. Habib’in zevce-i menkûha-i metrûkesi olduğunu iddi‘â edip zâtı ta‘rîf-i şer‘î ile mu‘arrefe olan hâfizetü’l-kitâb Saliha Hatun bt. Abdullah mahfil-i kazâda müteveffâ-yı mezbûrun vesâyâsını tenfîze vasiyy-i muhtârı olmağla terekesine vaz‘-ı yed eden Ali Çelebi b. İnayetullah mahzarında üzerine da‘vâ ve takrîr-i kelâm edip ben müteveffâ-yı mezbûrun memlûke câriyesi olup târîh-i kitâbdan yirmi dört sene mukaddem ba‘de’l-i‘tâk üç bin sağ akçe mehr-i müeccel ile beni tezevvüc ve kabûl edip akd-i nikâh beynimizde kāim iken mehr-i mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl vasiyy-i mezbûr terekeye vaz‘-ı yedini ikrâr ve müdde‘iye-i mezbûrenin müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Sinan Ağa mahallesinde sâkin [158b] el-Hâc Mustafa b. Musa ve Sultan Bayezid-i Veli kurbünde Yenimahalle’de sâkin Mehmed b. Hüseyin li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Derviş b. el-Hâc İlyas b. Habib târîh-i kitâbdan yirmi dört sene mukaddem müdde‘iye-i mezbûre Saliha’yı ba‘de’l-i‘tâk huzûrumuzda üç bin sağ akçe mehr-i müeccel tesmiyesiyle tezevvüc ve kabûl edip beynlerinde bu vech üzere akd-i nikâh kāim oldu biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 29 min-Cumâdelâhire sene 1110 Şuhûdü’l-hâl: Mehmed Çelebi b. İbrahim, el-Hâc Ömer b. Ali, Mehmed Çelebi b. Mehmed, Hasan Çelebi b. Abdullah, es-Seyyid İsmail Çelebi b. Emrullah, Mehmed b. Abdullah, Ali Efendi b. Ahmed, İbrahim Çelebi b. Mehmed.