Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 854 Hüküm no: 695 Orijinal metin no: [158b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefat eden Derviş’in varisi olduğunu ispat ettiği Mahmiye-i İstanbul’da Hoca Gıyaseddin mahallesinde sâkin iken bundan akdem vefât eden el-Hâc Derviş b. İlyas b. Habib’in li-ebeveyn hâletesi olduğunu iddi‘â eden zâtı ta‘rîf-i şer‘î ile mu‘arrefe olan hâfızetü’l-kitâb Âişe Hatun b. Hüseyin mahfil-i kazâda müteveffâ-yı mezbûrun vesâyâsını tenfîze vasiyy-i muhtârı olmağla terekesine vaz‘-ı yed eden Ali Çelebi b. İnayetullah mahzarında üzerine da‘vâ ve takrîr-i kelâm edip müteveffâ-yı mezbûrun vâlidesi Şehriban ile ben li-ebeveyn karındaşlar olup anamız ismi Âmine ve babamız ismi mezbûr Hüseyin ve dedemiz ismi Habib ve maskat-ı re’simiz vilâyet-i Anadolu’da Kastamonu kasabasında Gökdere mahallesidir müteveffâ-yı mezbûrun verâseti zevcesi Saliha bt. Abdullah ile zât-ı rahm cihetinden bana münhasıradır müteveffâ-yı mezbûrun cihet-i mezbûreden benden gayrı vârisi ve terekesinin selâse-i erbâ‘ına âhar müstahık yoğiken vasiyy-i mezbûr terekenin selâse-i erbâ‘ını bana teslîmden imtinâ‘ eder suâl olunsun dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra vech-i muharrer üzere vaz‘-ı yedini ikrâr ve müdde‘iye-i mezbûrenin ber-vech-i meşrûh müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden fi’l-asl zikr olunan Kastamonu kasabasında İbn-i Neccâr mahallesinden olup mahmiye-i mezbûrede Hoca Hayreddin mahallesinde sâkin Mehmed Usta b. Hüseyin ve Müezzin Mehmed Çelebi b. Muharrem li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûrun vâlidesi Şehriban ile işbu müdde‘iye-i mezbûre Âişe Hatun li-ebeveyn karındaşlardır anaları mezbûre Âmine ve babaları mezbûr Hüseyin ve dedeleri ismi Habib ve maskat-ı re’sleri sâlifü’z-zikr Gökdere mahallesidir müteveffâ-yı mezbûrun verâseti zevcesi Saliha ile zât-ı rahm cihetinden müdde‘iye-i mezbûreye münhasıradır terekesinin selâse-i erbâ‘ına müdde‘iye-i mezbûreden gayrı vâris ve âhar müstahık olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 29 min-Cumâdelâhire sene 1110 Şuhûdü’l-hâl: Eş-şâhidûnü’s-sâbikūn.