Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 857 Hüküm no: 698 Orijinal metin no: [159a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın vefat eden ortağı Hüseyin’de alacağı olduğunu ispat ettiği Mahmiye-i İstanbul’da Karaki Hüseyin Ağa mahallesinde sâkin Ahmed Ağa b. Veli b. İbrahim tarafından husûs-ı âti’l-beyâna müseccel vekîli olan İmâm Ali mahallesinde sâkin Yusuf Beşe b. Abdullah mahfil-i kazâda Tülbentçi Hüsam mahallesi ahâlîsinden iken bundan akdem vefât eden el-Hâc Hüseyin b. Abdurrahman b. Abdurrezzak’ın verâseti zevce-i menkûha-i metrûkesi Fâtıma bt. Abdullah ile vâlidesi Rahime bt. el-Hâc Mehmed ve sagīr oğulları Hasan ve İsmail’e münhasıra oldukdan sonra sagīr-i mezbûrların vâlideleri ve vasiyy-i mansûbları olmağla tereke-i müteveffâ-yı mezbûra vaz‘-ı yed edip zâtı ta‘rîf-i şer‘î ile mu‘arrefe olan mezbûre Fâtıma bt. Abdullah mahzarında bi’l-vekâle üzerine da‘vâ ve takrîr-i kelâm edip mal müvekkilim merkūm Ahmed Ağa’nın ve amel müteveffâ-yı mezbûrun olup amel-i ticâretden hâsıl olan fâidenin dahi nısfı müvekkilim merkūmun ve nısf-ı âharı müteveffâ-yı mezbûrun olmak üzere akd-i şirket-i inân edip ba‘dehû müteveffâ-yı mezbûrun târîh-i fevtinden bir buçuk sene mukaddem müvekkilim merkūm şerîki müteveffâ-yı mezbûr ile Bezzâzistân kurbünde müvekkilim merkūm Ahmed Ağa’nın sâkin olduğu yağlıkçı dükkânında hesâb gördüklerinde müteveffâ-yı mezbûr el-Hâc Hüseyin müvekkilim merkūm Ahmed Ağa ile fesh-i akd-i şirket edip müvekkilim merkūmun re’s-i malından altmış bin sağ akçe ve târîh-i mezkûra gelince amel-i ticâretden hâsıl olan nemâdan dokuz bin akçenin nısfı benim ve nısf-ı âharı merkūm Ahmed Ağa’nın hakkı olmağla onu dahi mesârifime sarfla istihlâk edip min-haysü’l-mecmû‘ zimmetimde altmış dört bin beş yüz sağ akçe müvekkilim merkūm Ahmed Ağa’ya deynim vardır deyü huzûr-ı Müslimînde ikrâr ve işhâd edip kable’l-edâ fevt olmağla yed-i vasîde olan terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Zeyrek mahallesinde sâkin el-Hâc Ali b. Osman ve medîne-i Galata mahallâtından Câmi‘-i Kebîr mahallesinde sâkin el-Hâc Selim b. el-Hâc Ali li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Hüseyin b. Abdurrahman b. Abdurrezzak fevtinden bir buçuk sene mukaddem müvekkil-i merkūm Ahmed Ağa ile Bezzâzistân kurbünde sâkin olduğu yağlıkçı dükkânında hesâb gördüklerinde müteveffâ-yı mezbûr el-Hâc Hüseyin müvekkil-i merkūm Ahmed Ağa ile fesh-i akd-i şirket edip müvekkil-i merkūmun re’s-i malından altmış bin sağ akçe ve târîh-i mezkûra gelince amel-i ticâretden hâsıl olan nemâdan dokuz bin akçenin nısfı benim ve nısf-ı âharı merkūm Ahmed Ağa’nın hakkı olmağla onu dahi mesârifime sarfla istihlâk edip min-haysü’l-mecmû‘ zimmetimde altmış dört bin beş yüz sağ akçe müvekkil-i merkūm Ahmed Ağa’ya deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemînü’l-müvekkil mûcebiyle ba‘de’l-hükm mâ-vaka‘a kayd-şüd. Fî 29 min-Cumâdelâhire sene 1110. Şuhûdü’l-hâl: Abdullah Çelebi b. Yakub, Ahmed Efendi b. Emin Efendi, Mehmed Ağa b. Mustafa, el-Hâc Ali b. Ebubekir, Ahmed Çelebi b. Süleyman.