Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 856 Hüküm no: 697 Orijinal metin no: [159a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Derviş’in varislerinin hisselerini vasiden teslim aldıkları Husûs-ı âti’l-beyânın mahallinde tahrîri içün savb-ı şer‘-i enverden bi’t-taleb irsâl olunan Mevlânâ Yahya Efendi mahmiye-i İstanbul’da Kebeciler Hanı karşısında el-Hâc Mahmud’un Çukurhan’da odasına varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf eyledikde mahmiye-i mezbûrede Hoca Gıyaseddin mahallesinde sâkinen fevt olan el-Hâc Derviş b. İlyas’ın verâseti zevce-i menkûha-i metrûkesi Saliha Hatun bt. Abdullah’a ve li-ebeveyn hâletesi ve zât-ı rahm cihetinden vârisesi Âişe Hatun bt. Hüseyin’e münhasıra oldukdan sonra zâtı el-Hâc Mehmed b. Hüseyin ve Hasan Çelebi b. Abdullah ta‘rîfleriyle mu‘arrefe olan mezbûre Saliha Hatun meclis-i ma‘kūd-ı mezbûrda müteveffâ-yı mezbûrun vasiyy-i muhtârı olmağla terekesine vaz‘-ı yed eden bâ‘isü’l-kitâb Ali Çelebi b. İnayetullah mahzarında ikrâr ve takrîr-i kelâm edip zevcim müteveffâ-yı mezbûrun zimmetinde mütekarrir olan para üç akçe hesâbı üzere üç bin akçe mehr-i müeccelim ile terekesinden ba‘de ihrâci’l-mesârif ber-mûceb-i defter-i kassâm-ı askerî rub‘ hissem olan yirmi beş bin yüz yirmi dört akçe ki cem‘an yirmi sekiz bin yüz yirmi dört sağ akçe hakkımı terekeden olmak üzere vasiyy-i mezbûr Ali Çelebi yedinden tamâmen alıp kabz edip zevcim müteveffâ-yı mezbûrun terekesine müte‘allık âmme-i mîrâs da‘vâsından mezbûr Ali Çelebi’nin zimmetini ibrâ-i âmm-ı katı‘ü’n-nizâ‘la ibrâ ve iskāt eyledim dedikde gıbbe’t-tasdîk zâtı mu‘arrifân-ı mezbûrân ta‘rîfleriyle mu‘arrefe olan mezbûre Âişe Hatun bt. Hüseyin meclis-i ma‘kūd-ı mezbûrda vasiyy-i mezbûr Ali Çelebi mahzarında ikrâr ve takrîr-i kelâm edip mûrisim müteveffâ-yı mezbûrun terekesinden ber-mûceb-i defter-i kassâm-ı askerî benim selâse-i erbâ‘ hissem olan para üç akçe hesâbı üzere yetmiş beş bin üç yüz yetmiş üç akçe hakkımı terekeden olmak üzere vasiyy-i mezbûr yedinden bi’t-tamâm ve’l-kemâl ahz u kabz eyledim min-ba‘d tereke-i müteveffâ-yı mezbûrdan mezbûr Ali Çelebi yedinde bir akçe ve bir habbe hakkım kalmayıp terekeye müte‘allıka âmme-i mîrâs da‘vâsından mezbûr Ali Çelebi’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû Çukadâr el-Hâc Süleyman b. Mehmed ve İbrahim Çelebi b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî gurre-i Receb sene 1110 Şuhûdü’l-hâl: el-Hâc Mehmed b. Hüseyin Haffâf, el-Hâc Mustafa b. Musa, el-Hâc Ömer b. Ali, Halil Efendi b. Hüseyin, Hasan Odabaşı b. Ali, el-Hâc Mustafa b. Hüseyin, el-Hâc Mehmed b. Hüseyin, es-Seyyid İsmail b. Emrullah, Mehmed b. İbrahim, Hasan Çelebi b. Abdullah, Mehmed b. Abdullah, Ahmed Çelebi b. Mehmed.