Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 859 Hüküm no: 700 Orijinal metin no: [159b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mehmed Ağa’nın küçük kızına nafaka takdiri Mahmiye-i İstanbul’da Mahmud Paşa mahallesi ahâlîsinden iken bundan akdem vefât eden el-Hâc Mehmed Ağa b. el-Hâc Ali’nin sulbiye-i sagīre kızı Fâtıma’nın tesviye-i umûruna bâ-hüccet-i şer‘iyye vasiyy-i muhtârı bâ‘isü’l-kitâb Ali Çelebi b. el-merhûm el-Hâc Mehmed Ağa meclis-i şer‘de takrîr-i kelâm ve ta‘bîr ani’l-merâm edip vasîsi olduğum sagīre-i mezbûrenin nafaka ve kisveye ihtiyâcı olmağla mal-ı müntakilinden ve akārâtı icârâtından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasiyy-i mezbûr[un] kelimât-ı meşrûhası vâkı‘a mutâbıka olduğu zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mukarrer oldukdan sonra hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri dahi para üçer akçe hesâbı üzere sagīre-i mezbûrenin akārâtı icârâtından yirmi iki akçe ve nukūdundan üç akçe ki min-haysü’l-mecmû‘ yevmî yirmi beşer sağ akçe nafaka ve kisve-bahâ farz ve takdîr buyurup meblağ-ı mefrûz-ı mezbûru levâzım-ı sagīre-i mezbûreye harc ü sarfa ve lede’l-iktizâ istidâneye ve inde’z-zafer malına rücû‘a vasiyy-i mezbûra izin vermeğin mâ-vaka‘a kayd-şüd. Fî gurreti Recebi’l-ferd sene 1110 Şuhûdü’l-hâl: Nikâtî Ali Efendi b. Osman, es-Seyyid Mustafa Efendi b. Cafer, Hüseyin Çelebi b. Mehmed, Ahmed Çelebi b. Ali, el-Hâc Süleyman Çukadâr, Halil Çelebi b. Yusuf, Ali Çelebi b. el-Hâc Ömer, Hasan Çelebi b. Mehmed.