Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 860 Hüküm no: 701 Orijinal metin no: [159b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un vefat eden eşi Mehmed Ağa’da mehir alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen irsâl olunan Mevlânâ Nikâtî Ali Efendi b. Osman mahmiye-i İstanbul’da Mahmud Paşa mahallesinde sâkin iken bundan akdem vefât eden el-Hâc Mehmed Ağa b. el-Hâc Ali’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde müteveffâ-yı mezbûrun verâseti zevce-i menkûha-i metrûkesi Safiye Hatun bt. Abdullah ile sulbî kebîr oğlu Ali Çelebi’ye ve kebîre kızı Saliha ve sagīre kızı Fâtıma’ya münhasıra olduğu şer‘an zâhir ve mütebeyyin oldukdan sonra zâtı mahmiye-i mezbûrede Aşçı Ali Ağa odaları ahâlîsinden Halil Çelebi b. Yusuf ve Kâtib Sinan mahallesinde sâkin Ahmed Çelebi b. Ali nâm kimesneler ta‘rîfleriyle mu‘arrefe olan mezbûre Safiye Hatun meclis-i ma‘kūd-ı mezbûrda müteveffâ-yı mezbûrun kebîr oğlu ve sagīre-i mezbûre Fâtıma’nın tesviye-i umûruna vasiyy-i muhtârı olmağla terekesine vaz‘-ı yed eden mezbûr Ali Çelebi mahzarında üzerine da‘vâ ve takrîr-i kelâm edip zevcim müteveffâ-yı mezbûr el-Hâc Mehmed b. el-Hâc Ali b. Sadık tezevvüc murâd eyledikde târîh-i kitâbdan yirmi beş sene mukaddem beni üç bin akçe mehr-i müeccel tesmiyesiyle huzûr-ı Müslimînde tezevvüc ve kabûl edip hattâ târîh-i kitâbdan bir ay mukaddem hâl-i hayâtında ve kemâl-i akl-ı sıhhatinde ber-vech-i muharrer zimmetinde mütekarrir ve ma‘kūdun-aleyh üç bin akçe mehr-i müeccel deynim vardır deyü huzûr-ı Müslimînde ikrâr ve işhâd edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden mu‘arrifân-ı mezbûrân Halil Çelebi b. Yusuf ve Ahmed Çelebi b. Ali li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed b. el-Hâc Ali b. Sadık hâl-i kemâl-i sıhhatinde fevtinden bir ay mukaddem ber-vech-i muharrer işbu müdde‘iye-i mezbûre Safiye Hatun’a zimmetimde mütekarrir ve ma‘kūdun-aleyh üç bin akçe mehr-i müeccel deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye edip gıbbe’t-ta‘dîl ve’t-tezkiye şehâdetleri makbûle oldukdan sonra gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr Nikâtî Ali Efendi mahallinde ketb ü tahrîr ba‘dehû ma‘an mürsel Çukadâr Hacı Süleyman b. Abdullah ve Hüseyin b. Mehmed ile meclis-i şer‘a gelip herbiri alâ-vukū‘ihi inhâ ve takrîr etmeğin mâ-vaka‘a kayd-şüd. Fî 29 min-Cumâdelâhire sene 1110 Şuhûdü’l-hâl: Ahmed b. Abdullah, es-Seyyid Mustafa Efendi b. Cafer, Ali Çelebi b. el-Hâc Ömer, İmâm Ahmed Efendi, Halil Efendi İmâm, el-Hâc İsmail b. İbrahim, Mehmed b. Ahmed, Mehmed Ağa b. Mahmud.