Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 870 Hüküm no: 708 Orijinal metin no: [161b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vefat eden eşi Ahmed’de mehir alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri içün bi’t-taleb me’zûnen irsâl olunan Mevlânâ es-Seyyid el-Hâc İsmail Efendi b. el-merhûm es-Seyyid Ahmed Efendi mahmiye-i İstanbul’da Kâtib Şemseddin mahallesinde Fâtıma Hatun bt. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûrda sâkin iken vefât eden el-Hâc Ahmed b. Mehmed’in verâseti zevce-i menkûha-i metrûkesi mezbûre Fâtıma Hatun ile sulbiye sagīre kızları Hadîce ve Afife ve Âişe’ye münhasıra oldukdan sonra zâtı ta‘rîf-i şer‘î ile mu‘arrefe olan mezbûre Fâtıma Hatun meclis-i ma‘kūd-ı mezbûrda sagīrân-ı mezbûrânın tesviye-i emrlerine tashîhan li’d-da‘vâ vasî nasb olunan Abdülbaki Çelebi b. Mahmud mahzarında üzerine da‘vâ ve takrîr-i kelâm edip zevcim müteveffâ-yı mezbûr el-Hâc Ahmed b. Mehmed b. Mahmud tezevvüc murâd ettikde târîh-i kitâbdan on beş sene mukaddem yüz guruş mehr-i müeccel tesmiyesiyle beni tezevvüc ve kabûl edip hattâ hâl-i marazında fevtinden dört gün mukaddem mehr-i müeccel hakkım olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı Müslimînden mu‘arrifân-ı mezbûrân İsmail Efendi b. el-Hâc Ali ve Abdullah Çelebi b. İsmail li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Ahmed b. Mehmed fevtinden dört gün mukaddem işbu müdde‘iye-i mezbûreye zimmetimde mehr-i müeccel yüz guruş deynim vardır deyü huzûrumuzda ikrâr [ve] bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de ri‘âyeti şerâiti’l-kabûl şehâdetleri makbûle olmağın gıbbe’t-tahlîfi’ş-şer‘î mûcebince hüküm vâki‘ hâli mevlânâ-yı mezbûr ma‘an Himmet b. Mehmed ve Abdi b. Mustafa. Fî 25 Cumâdelâhire sene 1110 Şuhûdü’l-hâl: Mustafa b. Mehmed, Abdullah b. Abdullah, Hamdullah(?) b. Ahmed, İbrahim Efendi b. Ahmed, el-Hâc Mustafa b. İbrahim.