Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 870 Hüküm no: 707 Orijinal metin no: [161b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice ve Fatıma hatunların evlerini Panos zimmiye sattıkları Husûs-ı âti’l-beyânın mahallinde ketb ü tahrîri içün savb-ı şer‘den me’zûnen Mevlânâ Yusuf Efendi b. Veliyüddin irsâl olunup ol dahi mahmiye-i İstanbul’da Şeyh Ferhad mahallesinde zikri âtî menzile varıp zeyl-i vesîka[da] muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûrede sâkine olup zâtları Mustafa Çelebi b. Ömer ve Yakub Çelebi [b.] Mehmed ta‘rîfleriyle mu‘arrefe olan Hadîce ve Fâtıma b[intey] Mehmed meclis-i ma‘kūd-ı mezbûrda bâ‘isü’s-sifr Panos v. Haçador nâm Ermeni mahzarında herbiri ikrâr ve takrîr-i kelâm edip arsası senede Ayasofya-i Kebîr vakfına yirmi yedi akçe mukāta‘ası olup binâsı akd-i âti’z-zikr sudûruna değin yed-i mezbûrda ale’l-iştirâki’s-seviyy mülk ve hakkımız olup <> mahalle-i mezbûrede vâki‘ bir tarafdan kendi mülkümüz ve bir tarafdan Ananya zimmî ve bir tarafdan Terzi Kirkor zimmî ve bir tarafdan Hüseyin Ağa mülkü ve ba‘zan tarîk-i hâs ile mahdûd fevkānî bir bâb oda ve bir sofa ve tahtânî bir oda ve bir sofa ve havlu ve kenîf ve müşterek sokak kapısını müştemil menzilimizi bi-cümleti’t-tevâbi‘ ve’l-levâhık mezbûr Panos zimmîye yüz doksan guruşa bey‘ u temlîk ve teslîm ol dahi iştirâ ve temellük ettikden sonra semeni olan meblağ-ı mezbûr yüz doksan guruşu mezbûr Panos zimmî yedinden tamâmen alıp kabz eyledik ba‘de’l-yevm menzil-i mahdûd-ı mezbûr merkūm Panos’un mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr tahrîr Hasan ve Abdullah ile meclis-i şer‘a gelip vukū‘u üzere inhâ etmeğin mâ-vaka‘a bi’t-taleb kayd-şüd. Fî 2 Recebi’l-ferd sene 1110 Şuhûdü’l-hâl: Halil Efendi b. ( ) el-İmâm, Mehmed Halîfe b. İvaz(?), Seyyid Mustafa b. Mehmed, Hüseyin Beşe b. Hasan, Ebubekir Çelebi b. İbrahim.