Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 874 Hüküm no: 712 Orijinal metin no: [162a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehbaz Hatun vefat eden Mustafa Ağa’nın kendisine para vasiyet ettiğini ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen irsâl olunan Mevlânâ Hâfız Mehmed Efendi b. eş-Şeyh Mustafa mahmiye-i İstanbul’da Kabasakal Sinan Ağa mahallesinde sâkin iken bundan akdem vefât eden Mustafa Ağa b. Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i mübîn ettikde müteveffâ-yı mezbûrun verâseti zevce-i menkûha-i metrûkesi Afife Hatun bt. Abdullah ile li-ebeveyn kız karındaşı İsmihan Hatun’a münhasıra oldukdan sonra müteveffâ-yı mezbûrun mu‘takası ve mûsâ-lehâsı olduğunu iddi‘â eden zâtı ta‘rîf-i şer‘î ile mu‘arrefe olan hâfızatü’l-kitâb Şehbaz bt. Abdullah meclis-i ma‘kūd-ı mezbûrda mezbûre Afife Hatun tarafından husûs-ı âti’l-beyânda müseccel vekîli ve müteveffâ-yı mezbûrun vesâyâsını tenfîze vasiyy-i muhtârı olan eş-Şeyh Mehmed Efendi b. Şa‘bân mahzarında üzerine da‘vâ ve takrîr-i kelâm edip seyyidim müteveffâ-yı mezbûr Mustafa Ağa b. Ahmed b. Mehmed hâl-i marazında fevtinden on beş gün mukaddem bi-emrillâhi te‘âlâ dâr-ı fenâdan saray-ı bekāya irtihâl eylediğimde cemî‘ malımın sülüsünden bana otuz guruş verile deyü vasiyet edip musırran alâ-îsâihî fevt olup cemî‘ malının sülüsü meblağ-ı mûsâ-bih-i mezkûra müsâ‘id iken mezbûr Mehmed Efendi bana teslîmden imtinâ‘ eder suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden olup mahalle-i mezbûrede sâkin Müezzin el-Hâc Abdullah b. Hasan ve Kayyum Mustafa Çelebi b. Osman li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Mustafa Ağa b. Ahmed b. Mehmed hâl-i marazında bi-emrillâhi te‘âlâ dâr-ı fenâdan saray-ı bekāya irtihâl eylediğimde malımın sülüsünden işbu mu‘takası Şehbaz bt. Abdullah’a otuz guruş verile deyü huzûrumuzda vasiyet edip musırran alâ-îsâihî fevt oldukda cemî‘ malının sülüsü meblağ-ı mûsâ-bih-i mezkûr otuz guruşa vâfî ve kâfîdir biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr edip ba‘dehû ma‘an irsâl olunan Hüseyin b. Mehmed ve Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 24 Cumâdelâhire sene 1110 Şuhûdü’l-hâl: Mehmed Efendi b. Abdüllatif, Mustafa Çelebi b. Mehmed Efendi, Derviş Bey b. Mustafa, el-Hâc Hasan b. Ali, Mustafa Çelebi b. Hasan, İbrahim Çelebi b. Hasan, Mustafa Çelebi b. Mehmed.