Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 875 Hüküm no: 713 Orijinal metin no: [162a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Afife Hatun’un varislerinin mirası bölüşüp zimmetlerini ibra ettikleri Husûs-ı câi’z-zikrin mahallinde tahrîri içün taraf-ı şer‘-i münîrden matlûben irsâl olunan Mevlânâ es-Seyyid Abdülmuti Efendi mahmiye-i İstanbul’da Fethiye kurbünde Kâtib Muslihiddin mahallesinde sâkin sâdât-ı kirâmın başçavuşları fahrü’l-eşrâf es-Seyyid Mehmed menziline varıp zeyl-i kitâbda muharrerü’l-esâmî udûl-ı Müslimîn ve sikāt-ı muvahhidîn huzûrunda akd-i meclis-i şer‘-i şerîf eyledikde menzil-i mezbûrda sâkine iken bundan akdem vefât eden merhûme Şerife Afife Hatun bt. el-merhûm es-Seyyid Ebubekir Çavuş’un verâseti zevc-i metrûku merkūm es-Seyyid Ali Ağa’ya ve li-ebin karındaşı es-Seyyid Ali Çelebi’ye münhasıra olduğu şer‘an mütehakkik oldukdan sonra mezbûr es-Seyyid Ali Çelebi meclis-i ma‘kūd-ı mezbûrda tereke-i müteveffât-ı mezbûreye vâzı‘u’l-yed olan zevci mezbûr es-Seyyid Ali Ağa mahzarında ikrâr-ı tâm ve takrîr-i kelâm edip hemşîrem Şerife Afife Hatun hayâtında babamız merhûm-ı mezbûr es-Seyyid Ebubekir Çavuş’un muhallefâtından üç yüz kırk guruşluk eşyâ mezâddan iştirâ ve kabz edip lâkin işbu defter-i kassâm mûcebince mezbûrenin [162b] hisse-i irsiyesi ancak iki yüz yirmi beş guruş olmağla kendüye yüz on beş guruş ziyâde hakkım geçip ba‘dehû müte‘âkıben vefât edip terekeleri benim kabzımda olan sagīr karındaşlarımız Şerife Saliha ve Nimetullah ve es-Seyyid Mehmed’in terekelerinden mezbûre Afife Hatun’a yüz on beş guruş isâbet etmekle kable’l-ahz vefât etmeğin hâlâ sıgārûn hissesini ziyâde geçen meblağ-ı mezbûra takas olunup ve işbu deyn temessüğüm mûcebince mukaddemâ bey‘ olunan menzil semeni hissesinden benim zimmetimde hakkı olan yüz otuz guruşun elli altı guruşunu hayâtında kendüye edâ ve teslîm etmekle zimmetimde bâkī kalan yetmiş dört guruş hakkını zevci mezbûr es-Seyyid Ali Ağa zimmetinde mütekarrir olan yirmi bin akçe mehr-i müeccelden hisseme âid olan nısfına takas ol dahi mukāssa ve kabûl edip ve mezbûrenin medyûnu es-Seyyid İbrahim’in zimmetinde olan yetmiş guruşun kırk beş guruşunu mezbûr es-Seyyid Ali Ağa’nın mezbûre Afife Hatun zimmetinde cihet-i deyn-i şer‘îden hakkı olan kırk beş guruş mukābelesinde istîfâ ve bâkī yirmi beş guruşu hisse-i irsiyesine mahsûb etmek üzere kabûl edip ve müteveffât-ı mezbûrenin ammetemiz hatun zimmetinde hakkı olan yirmi beş guruşa kezâlik ben hisse-i irsiyeme mahsûb etmek üzere kabûl etmekle vech-i meşrûh üzere cemî‘ hesâbımızı gördüğümüzden sonra müteveffât-ı mezbûrenin mecmû‘ terekesi olmak üzere bey‘ eylediğimiz huliyy ve melbûsât ve sâir döşeme ve evânî ve câriye semenlerinden min-haysü’l-mecmû‘ ba‘de küllî hesâb hâsıl olan beş yü[z] elli bir guruşu beynimizde işbu meclisde iktisâm ve herbirimiz kendüye âid olan iki yüz yetmiş beş buçuk guruş hisse-i irsiyesini tamâmen ahz u kabz ve istîfâ edip min-ba‘d biri birimizin zimmetinde ve yedinde bir akçe ve bir habbe hakkımız bâkī kal[ma]mağla husûs-ı mîrâs-ı mezbûra ve târîh-i kitâba gelince beynimizde cereyân eden cemî‘ hukūk-ı ma‘lûme ve mechûleye müte‘allıka âmme-i de‘âvî ve mutâlebâtdan ve eymân ve muhâsamâtdan herbirimiz âharın zimmetini ibrâ-i âmla ibrâ ve iskāt eyledik ba‘de’l-yevm vechen mine’l-vücûh da‘vâ ve nizâ‘ımız kalmamışdır dedikde mezbûr es-Seyyid Ali Ağa dahi mukırr-ı merkūm es-Seyyid Ali Çelebi’nin cemî‘ kelimât-ı meşrûhasını tasdîk ve tahkīk ve kezâlik vech-i meşrûh üzere zimmetini ibrâ-i âmla ibrâ ve iskāt etmeğin vâki‘ hâli mevlânâ-yı mezbûr mahallinde tahrîr ma‘an ba‘s olunan İbrahim Çelebi b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 27 min-Cumâdelâhire sene 1110 Şuhûdü’l-hâl: Umdetü’l-meşâyihi’l-kâmilîn eş-Şeyh İsa Efendi b. Ali, Zahrü’l-emâsil es-Seyyid İbrahim Ağa b. Mehmed, es-Seyyid Aziz Efendi b. es-Seyyid Mehmed, es-Seyyid Hüseyin Ağa b. Seyyid Mahmud, el-Hâc Ali Efendi b. ( ) Muhzır-ı(?) Süleymaniye, İbrahim Efendi b. Mehmed İmâm, es-Seyyid İbrahim Çavuş b. es-Seyyid Mehmed, es-Seyyid Bekir Çavuş b. es-Seyyid Mehmed, Ahmed Efendi [b.] Müezzin Mehmed Ağa, el-Hâc Mustafa b. Müezzin Mehmed Ağa, İsmail Çelebi Sâ‘atçi.