Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 886 Hüküm no: 723 Orijinal metin no: [165a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Berber Osman Çelebi’nin oğlu İslam’ın miras hissesini vasisinden teslim aldığı Mahmiye-i İstanbul’da Edirnekapısı dâhilinde Şah Sultan mahallesinde sâkin iken bundan akdem vefât eden Berber Osman Çelebi b. Abdullah’ın sulbî kebîr oğlu İslam mahfil-i kazâda hâl-i sıgārında tesviye-i umûruna vasiyy-i şer‘îsi olmağla mal-ı müntakiline bi’l-vesâye vaz‘-ı yed eden bâ‘isü’l-kitâb Mehmed Çelebi b. Musa muvâcehesinde ikrâr ve takrîr-i kelâm edip babam müteveffâ-yı mezbûrun terekesinden benim hisseme isâbet eden elli dokuz guruşu mezbûr Mehmed Çelebi bi’l-vesâye ahz u kabz edip meblağ-ı mezbûrun altı guruşunu yine mahalle-i mezbûrede vâki‘ benim mülk menzilimin ta‘mîr ve termîmine harc ü sarf edip meblağ-ı bâkī elli üç guruşu vasiyy-i mezbûrun yedinde kalmış idi el-hâletü hâzihi benim bülûğum zâhir ve rüşdüme dahi hüccet-i şer‘iyye verilmekle meblağ-ı bâkī-i mezbûr elli üç guruşu dahi mezbûr Mehmed Çelebi yedinden tamâmen alıp kabz eyledim ve babam müteveffâ-yı mezbûrun mîrâsına müte‘allık âmme-i de‘âvî ve mutâlebâtdan mezbûr Mehmed Çelebi’nin zimmetini ibrâ-i âmm-ı katı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a kayd-şüd. Fî gurreti Recebi’l-mürecceb sene 1110 Şuhûdü’l-hâl: Mukayyid Mustafa Efendi b. Mehmed, Yahya Efendi b. Mustafa Efendi, Süleyman Efendi b. Mehmed Efendi, Ahmed Efendi birâder-i Süleyman Efendi, Mehmed Beşe b. Hüseyin, Hüseyin Beşe b. Ahmed ve gayruhum.