Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 886 Hüküm no: 722 Orijinal metin no: [164b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mehmed Efendi’nin varislerinden Mehmed’in miras hissesini alıp zimmetini ibra ettiği Mahmiye-i İstanbul’da Sarı Musa mahallesinde sâkin iken bundan akdem vefât eden Mehmed Efendi b. Ahmed’in verâseti zevce-i menkûha-i metrûkesi Fâtıma Hatun bt. Şa‘bân ile kebîre kızları Âişe ve Hadîce ve Emetullah ve Râbia’ya ve Şebinkarahisar sancağında Pazarsuyu müzâfâtından Piraziz nâhiyesine tâbi‘ Bayramşah-ı Bâlâ nâm karyede sâkin li-ebeveyn ammisi oğlu Nasuh’un sagīr oğlu Mehmed’e münhasıra oldukdan sonra sagīr-i mezbûr Mehmed’in tesviye-i umûruna yedinde mazmûnu müsbet hüccet-i şer‘iyye ile kıbel-i şer‘den mansûb vasîsi olup nâhiye-i mezbûra tâbi‘ Gökçe nâm karye sükkânından es-Seyyid Hasan Efendi b. Ahmed mahfil-i kazâda müteveffâ-yı mezbûrun cemî‘ terekesini zabt u hıfz ve sagīr-i mezbûrun hisse-i irsiyesini îsâle vasiyy-i muhtârı olan umdetü’l-vâ‘izîn eş-Şeyh Ahmed Efendi b. Hamza mahzarında bi’l-vesâye ikrâr ve takrîr-i kelâm edip müteveffâ-yı mezbûrun terekesi tahrîr ve ba‘de ihrâci’l-mesârif defter-i kassâm-ı askerî nâtık olduğu üzere sagīr-i mezbûr Mehmed’in hissesine isâbet eden on üç bin altı yüz on altı sağ akçeyi vesâyetim hasebiyle mezbûr eş-Şeyh Ahmed Efendi yedinden bi’t-tamâm ve’l-kemâl ahz u kabz eyleyip mezbûr Ahmed Efendi’nin yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a kayd-şüd. Fî 8 min-Recebi’l-mürecceb sene 1110 Şuhûdü’l-hâl: Muslu Efendi b. Mehmed, eş-Şeyh Hüseyin Efendi b. es-Seyyid Mahmud, Ali Efendi b. Ahmed el-İmâm, Hüseyin Efendi b. Mustafa, Mehmed Efendi b. Mahmud, Uşşâkī Mehmed Efendi, Hâfız Mehmed Efendi b. Mustafa, Ahmed Efendi b. Mehmed Efendi ve gayruhum mine’l-huzzâr.