Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 888 Hüküm no: 725 Orijinal metin no: [165a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa İbrahim Beşe’nin küçük oğluna vasi tayini Mahmiye-i İstanbul’da merhûm ve mağfûrun-leh Sultan Selim Hân Câmi‘-i şerîfi kurbünde Çukurbostan mahallesinde sâkin iken bundan akdem vefât eden İbrahim Beşe b. Kasım b. Ahmed’in sulbî sagīr oğlu Salih’in tesviye-i emrine kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf ve vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-mutahhar zâhir ve mütebeyyin olan işbu hâfızü’l-kitâb Şahin Beşe b. Ahmed’i hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun vakt-i rüşd ü sedâdına varınca vasî nasb ü ta‘yîn buyurduklarında ol dahi vesâyet-i mezbûru kabûl ve hizmet-i lâzımesini edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Recebi’l-mürecceb li-sene aşer ve mi’e ve elf. Şuhûdü’l-hâl: Çukurbostan imâmı Abdullah Efendi, Müezzin Mehmed Efendi b. Ahmed, İmâm Hasan Efendi b. ( ), Çörekçi Ahmed Çelebi ve gayruhum mine’l-hâzırîn.