Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 888 Hüküm no: 726 Orijinal metin no: [165a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Fazlullah Ağa’nın varislerinin miras davasında zimmetlerini ibra ettikleri Husûs-ı âti’l-beyânın mahallinde ketb ü tahrîri iltimâs olunmağın cânib-i şer‘-i şerîfden irsâl olunan Mevlânâ Abdullah Efendi mahmiye-i İstanbul’da Nevbethâne kurbünde Dâye Hatun mahallesinde sâkin iken bundan akdem vefât eden el-Hâc Fazlullah Ağa b. Ali b. Ebubekir nâm müteveffânın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî eyledikde müteveffâ-yı mezbûrun verâseti zevce-i menkûha-i metrûkeleri Râbia Hatun bt. Abdullah ve Fâtıma Hatun bt. Abdullah ile sulbî sagīr oğlu Mehmed’e ve sulbiye sagīre kızları Rukiye ve Zeyneb’e ba‘dehû sagīrân-ı mezbûrân Mehmed ve Rukiye müte‘âkıben vefât edip verâsetleri vâlideleri mezbûre Fâtıma ve li-ebeveyn hemşîreleri mezbûre Zeyneb’e münhasıra olduğu şer‘an zâhir ve mütebeyyin oldukdan sonra zâtı mahalle-i mezbûre sükkânından Salih Çelebi [b.] Ahmed ve Attâr Ali Çelebi b. Abdullah ta‘rîfleriyle mu‘arrefe olan mezbûre Râbia Hatun meclis-i ma‘kūd-ı mezbûrda işbu bâ‘isetü’l-kitâb mezbûre Fâtıma Hatun tarafından husûs-ı âti’l-beyânda vekîl olduğu mu‘arrifân-ı mezbûrân Müezzin Salih Çelebi b. Ahmed ve Mehmed Çelebi b. Ali şehâdetleriyle şer‘an sâbit ve sübût-ı vekâletine hükm-i şer‘î lâhık olan hâlâ zevci es-Seyyid Mehmed Çelebi [b.] el-Hâc Veli mahzarında ikrâr ve takrîr-i kelâm edip zevcim müteveffâ-yı mezbûrun terekesinden mahalle-i mezbûrede vâki‘ bir tarafdan merhûm Halil Sipâ[hî] mülkü ve bir tarafdan Yağcı kızı Saime Hatun mülkü ve bir tarafdan Kara Osman Ağa mülkü ve bir tarafdan tarîk-i âm ile mahdûd büyût-ı adîde[yi] müştemil mülk menzilinden bi-hasebi’l-irs bana isâbet eden on altı sehmden bir sehm hissemi menzil-i mahdûd-ı mezbûra vâzı‘atü’l-yed olan müvekkile-i mezbûre dahi mûrisimiz müteveffâ-yı mezbûrun terekesinden nakd üç yüz guruşunu sen ahz u kabz eyledin deyü benden da‘vâ sa[de]dinde olmağla beynimizde münâza‘ât-ı kesîre vukū‘undan sonra muslihûn tavassut edip da‘vâ-yı mezkûrumdan beni yetmiş beş guruşa inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yetmiş beş guruşu müvekkile-i mezbûrenin kendi malından olmak üzere vekîl-i mezbûr yedinden tamâmen ahz u kabz edip menzil-i mahdûd-ı mezbûra ve mukaddemâ benim emrim ile dâyinim [165b] Ömer nâm kimesneye vekîl-i mezbûr es-Seyyid Mehmed Çelebi’nin verdiği iki bin yüz seksen akçeye ve sâir tereke-i müteveffâ-yı mezbûra ve beynimizde ma‘lûm menzil husûsuna müte‘allıka âmme-i da‘vâdan müvekkile-i mezbûre Fâtıma Hatun’un ve sagīre-i mezbûre Zeyneb’in ve vekîl-i mezbûr es-Seyyid Mehmed Çelebi’nin zimmetlerini ibrâ-i âmm-ı katı‘ü’n-nizâ‘la ibrâ ve iskāt eyledim dedikde gıbbe’t-tasdîk vekîl-i mezbûr es-Seyyid Mehmed Çelebi dahi bedel-i sulh olan meblağ-ı mezbûra ve tereke-i müteveffâ-yı mezbûrdan olmak üzere iddi‘â eylediği üç yüz guruşa ve sâir müteveffâ-yı mezbûrun terekesine müte‘allıka âmme-i da‘vâdan mezbûre Râbia Hatun’un zimmetini kezâlik ibrâ-i âmm-ı katı‘ü’n-nizâ‘la ibrâ ve iskāt etmeğin vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Çukadâr el-Hâc Süleyman b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 6 min-Recebi’l-ferd sene 1110 Şuhûdü’l-hâl: Mehmed Çelebi b. Ali mahalle-i mezbûre, el-Hâc Ömer Ağa b. Zülfikâr mahalle-i mezbûre, Muharrem Beşe b. Yunus, Süleyman b. Abdullah, Muslu Beşe b. ( ), Mahmud Beşe b. Veli, Mehmed Ağa b. İbrahim, Abdullah Ağa b. Derviş Mehmed el-Mübâşir, Ahmed b. Abdurrahman, Kılcı Bayram b. Mahmud, Ahmed Çelebi b. ( ), Sarı Osman Ağa’nın oğlu İbrahim Ağa, Sarı Osman Ağa’nın oğlu Salih Ağa, Ahmed b. Ali.