Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 893 Hüküm no: 731 Orijinal metin no: [166a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Ahmed Çelebi’nin varislerinin terekeden para gizlediği iddiasıyla Mustafa’ya açtıkları davada haksız bulundukları Husûs-ı âti’l-beyânı mahallinde istimâ‘ ve tahrîri içün bi’l-iltimâs bu fakīr Dârü’l-hilâfeti’l-aliyye Kostantıniyyetü’l-mahmiye’de kāimmakām-ı hazret-i sadrazamî huzûr-ı âlîlerinde akd-i meclis-i şer‘-i şerîf olundukda mahmiye-i mezbûrede Bezzâz-ı cedîd mahallesinde sâkin iken târîh-i kitâbdan <<üç>> bir sene mukaddem vefât eden el-Hâc Ahmed Çelebi b. Abdulkadir b. Abdullah’ın sulbiye kebîre kızı Âişe Hatun tarafından husûs-ı âti’z-zikrde bâ-hüccet-i şer‘iyye vekîli Hasan Çavuş b. Ali vekâleten ve müteveffâ-yı mezbûrun li-ebeveyn ammi oğlu ve müvekkile-i mezbûrenin zevci Yusuf b. Hasan asâleten meclis-i ma‘kūd-ı mezbûrda müteveffâ-yı mezbûrun mu‘takı hâfızü’l-kitâb el-Hâc Mustafa b. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Ahmed Çelebi vefât eyledikde terekesinden hâric ez defter kassâm-ı askerî her kesesi beş yüz guruş olmak üzere otuz kese guruşu Vâlide Câmi‘-i şerîfi kurbünde Yeni çarşıda mahzeninden bi-gayr-ı hakkın ahz u kabz ve ketm ü ihfâ edip hattâ târîh-i kitâbdan iki ay mukaddem mahmiye-i mezbûrede Mercan çarşısında kendi dükkânında vech-i muharrer üzere meblağ-ı mezbûru ahz u kabz ve ketm ü ihfâ eylediğini alâ ruûsi’l-işhâd ikrâr ve işhâd dahi eylemişdir suâl olunsun dedikde gıbbe’s-suâl ve akībe’l-inkâr müdde‘iyyân-ı mezbûrândan müdde‘âlarına beyyine taleb olundukda mahmiye-i mezbûrede Sarıgörez mahallesinde sâkin Ali b. Abdullah ve Acıçeşme’de sâkin Çıbıkçı Yusuf Beşe b. Osman li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka mezbûr el-Hâc Mustafa b. Abdullah’ın târîh-i kitâbdan iki ay mukaddem zikr olunan Mercan’da dükkânına kahve almak içün vardığımızda müteveffâ-yı mezbûr Ahmed Çelebi’nin verese<> sinde defterinden hâric bir nesne kaldı mı <> dedim mezbûr el-Hâc Mustafa’dan suâl eylediğimizde zikr olunan mahzeninden veresesine vermek içün hâric ez defter otuz kese guruşunu ketm ü ihfâ eyledim deyü bizim huzûrumuzda ikrâr eyledi biz bu husûsa bu vech üzere şâhidleriz şehâdet dahi ederiz deyü her biri şehâdet eylediklerinde mezbûr el-Hâc Mustafa mezbûrân Ali [ve] Yusuf’dan her biri husûs-ı mezbûrda şehâdet etmek içün târîh-i kitâbdan üç gün mukaddem Süleymaniye kurbünde kahvehânede yüz yetmiş guruş ücret vermek üzere müdde‘î-i mezbûr Yusuf ile kavl eylemişlerdir deyü şâhidân-ı mezbûrânı cerh eyledikde mezbûr el-Hâc Mustafa’dan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Mercan Ağa mahallesinde sâkin Receb Çelebi b. Abdurrahman ile tüccârdan es-Seyyid Abdullah Çelebi b. es-Seyyid Ömer li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka işbu şâhidân-ı mezbûrândan her biri târîh-i kitâbdan üç gün mukaddem zikr olunan kahvehânede husûs-ı mezbûra şehâdet etmek içün müdde‘î-i mezbûr Yusuf ile yüz yetmiş guruşa huzûrumuzda kavl eylediler biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde şâhidân-ı mezbûrân Receb Çelebi ve es-Seyyid Abdullah Çelebi’yi tezkiye içün bâ-fermân-ı âlî cânib-i şer‘den irsâl olunan Mevlânâ Yahya Efendi zikr olunan Mercan Ağa mahallesinde Hân-ı Cedîd’e varıp tefahhus eyledikde ahâlîsinden Mehmed b. İbrahim ve İshak b. Ramazan ve Mustafa b. Ramazan ve Hammâmî el-Hâc Mustafa ve Mahmud Ağa ve Nasuh Beşe ve Hüseyin Beşe ve Hüseyin b. Hızır ve Hüseyin b. Mehmed [166b] ve el-Hâc Mehmed b. Hasan nâm kimesneler mezbûrân Receb Çelebi ve es-Seyyid Abdullah Çelebi içün adl ve makbûlü’ş-şehâdelerdir deyü haber verdiklerini mevlânâ-yı mezbûr mahallinde tahrîr ba‘dehû ma‘an irsâl olunan Mübâşir Osman Çavuş ve Mehmed b. Pîrî ve Nasuh Beşe b. Ali ile meclis-i şer‘a gelip alâ-vukū‘ihi inhâ ve takrîr etmeğin şehâdetleri makbûle olup cerh beyyinesi evlâ olmağla mezbûrân Ali ve Yusuf’un şehâdetleri makbûle olmamağla müdde‘iyyân-ı mezbûrân Hasan Çavuş ve Yusuf mezbûr el-Hâc Mustafa’ya yemîn dahi vermeyip husûs-ı mezbûra müte‘allık her biri mu‘ârazadan men‘ olunup mâ-vaka‘a kayd-şüd. Fî 9 min-Receb sene 1110 Şuhûdü’l-hâl: Umdetü’l-mevâli’l-izâm Hasan Efendi el-Kādî bi-Yenişehir sâbıkā, Kânî Ahmed Efendi Tezkire-i evvel, Hâfız Mehmed Efendi Tezkire-i sânî, Abdulkadir Ağa b. İbrahim, el-Hâc Mehmed b. Ali, Mustafa b. İbrahim, Hüseyin b. İbrahim, Hüseyin b. Abdullah ve gayruhum.