Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 892 Hüküm no: 730 Orijinal metin no: [166a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mehmed Efendi’nin vasisi Mustafa Efendi’ye yapılan muarazanın meni Mahmiye-i İstanbul’da Emin Sinan mahallesi ahâlîsinden olup bundan akdem intikāl-i dâr-ı bekā eden merhûm Mehmed Efendi b. el-merhûm Süleyman Efendi’nin terekesinin sülüsünü kabz edip vesâyâsını tenfîze vasiyy-i muhtârı olan fahrü’l-müderrisîni’l-kirâm Mustafa Efendi b. Halil’in üzerine hasbî nâzırları Osman Efendi b. Abdurrahim ve es-Seyyid Ahmed Çelebi b. Mustafa meclis-i şer‘-i hatîr-ı lâzımü’t-tevkīrde vasiyy-i mezbûr Mustafa Efendi mahzarında herbiri üzerine da‘vâ ve takrîr-i kelâm edip müteveffâ-yı mezbûrun terekesinin sülüsü olan iki bin sekiz yüz yirmi dokuz guruşu ahz u kabz edip vesâyâsını tenfîz etmeyip zimmetinde kalmışdır suâl olunup müteveffâ-yı mezbûrun vesâyâ-yı mu‘ayyenesini tenfîze tenbîh olunmak matlûbumuzdur dediklerinde gıbbe’s-suâl vasiyy-i mezbûr cevâbında sülüs-i mezbûrdan makbûzum olan meblağ-ı mezbûru müteveffâ-yı mezbûrun vasiyeti mûcebince işbu yedinde olan mümzâ ve mahtûm defter nâtık olduğu üzere vücûh-ı mu‘ayyeneye sarf edip yedimde sülüs-i mezbûrdan bir akçe bâkī kalmamışdır dedikde vasiyy-i mezbûr yemîniyle musaddık olmağın sülüs-i mezbûru müteveffâ-yı mezbûrun vasiyeti üzere mûcebince vesâyâsına sarf edip zimmetinde bâkī bir şey kalmadığına vasiyy-i mezbûra yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebiyle mezbûrân Osman Efendi ve es-Seyyid Ahmed Çelebi husûs-ı mezbûra müte‘allık vasiyy-i mezbûr ile bî-vech mu‘ârazadan men‘ olunup mâ-vaka‘a kayd-şüd. Fî 7 min-Receb sene 1110 Şuhûdü’l-hâl: Ahmed Şems Efendi [b.] Emin Mehmed Efendi, Ahmed Çelebi b. Süleyman, el-Hâc Süleyman Çukadâr, Nasuh Beşe b. Yusuf.