Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 896 Hüküm no: 733 Orijinal metin no: [166b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vasisi olduğu Ali Efendi’den alacaklarını tahsil edip zimmetini ibra ettiği Mahmiye-i İstanbul’da Mimârayas mahallesinde sâkin iken bundan akdem vefât eden Çorbacı Ali Ağa b. Enver’in sulbiye kebîre kızı olup hâlâ mahrûse-i Galata’da Bereketzâde mahallesinde sâkine Fâtıma Hatun’un üvey babası ve tarafından husûs-ı âti’l-beyânda vekîl olduğu zâtını ma‘rifet-i şer‘iyye ile ârifân mârrü’z-zikr Bereketzâde mahallesinde sâkin Hüseyin Bey b. Abdullah ve Arab Câmi‘i mahallesinde sâkin el-Hâc Ali b. Fazlullah şehâdetleriyle hasm-ı câhid muvâcehesinde şer‘an sâbit ve sübût-ı vekâletine hükm-i şer‘î lâhık olan el-Hâc Mehmed b. el-Hâc Mustafa meclis-i şer‘-i şerîfde müvekkile-i mezbûrenin hâl-i sıgārında vasiyy-i muhtârı olan işbu bâ‘isü’l-kitâb Ali Efendi b. Ahmed mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Fâtıma Hatun’un babası tereke-i mebî‘asından ve medyûnu Abdi Ağa’dan istîfâ olunan yüz guruşdan ve ba‘dehû fevt olan li-ebeveyn kız karındaşı Saliha’dan min-haysü’l-mecmû‘ ber-mûceb-i defter-i kassâm mezbûrenin hissesi olmak üzere vasiyy-i mezbûrun makbûzu olan asl-ı mal-ı Fâtıma seksen iki bin altı yüz yirmi sekiz sağ akçe olup makbûz-ı mezbûrun otuz iki bin sekiz yüz iki akçesi doksan üç ayda ber-mûceb-i hüccet mezbûre Fâtıma’nın hâl-i [167a] sıgārında nafaka-i mefrûza ve sâir levâzımına harc ü sarf olunduğu lede’l-muhâsebe şer‘an zâhir ve müte‘ayyin olmağla makbûlümüz olup ba‘dehû asl-ı maldan bâkī kalan dört yüz on beş guruşla dokuz parayı vasiyy-i mezbûr Ali Efendi müvekkile-i mezbûre Fâtıma’ya bâliğa ve reşîde oldukdan sonra tamâmen edâ ve teslîm ol dahi yedinden ahz u kabz edip lâkin müddet-i mezbûrede müvekkile-i mezbûrenin sagīri hâlinde mal-ı mezbûreyi merkūm Ali Efendi i‘mâl etmeğin üç yüz guruş mikdârı ribh-i mal olmuşidi deyü ribh-i mezbûru vasiyy-i merkūmdan taleb ve da‘vâ ettidiğimizde nizâ‘-ı küllî vukū‘undan sonra mezbûr Ali Efendi ba‘de küllî hesâb benimle yüz altmış guruş üzerine sulh oldukda ben dahi vekâlet-i müsbetem hasebiyle sulh-ı mezbûru kabûl ve bedel-i sulh olan meblağ-ı mezbûrun yirmi üç guruşunu müvekkile-i mezbûre asâleten ve yüz on iki guruşunu vekâleten mezbûr Ali Efendi yedinden ahz u kabz edip ancak yirmi beş guruşu bâkī kalmışidi hâlâ mezbûr Ali Efendi meblağ-ı bâkī-i mezbûr yirmi beş guruşu dahi işbu meclis-i şer‘de bana edâ ve teslîm ben dahi yedinden tamâmen ahz u kabz eyledim min-ba‘d müvekkile-i mezbûre Fâtıma Hatun’un asl-ı malından ve murâbaha da‘vâsından mezbûr Ali Efendi zimmetinde bir akçe ve bir habbe hakkı bâkī kalmamağla husûs-ı mîrâs-ı mezbûr[d]an ve ziyâde-i ribh da‘vâsından ve bi’l-cümle âmme-i da‘vâdan vasiyy-i mezbûr Ali Efendi’nin zimmetini ibrâ-i âm ile ibrâ ve iskāt eyledim ol dahi kezâlik cemî‘ da‘vâdan müvekkile-i mezbûrenin zimmetini ibrâ-i âmla ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a kayd-şüd. Fî 3 min-Receb sene 1110 Şuhûdü’l-hâl: Ömer Çavuş b. Mahmud, İbrahim Ağa Kethüdâ-yı hazret-i efendi, el-Hâc Mustafa Kethüdâ-yı Attârân, Kadri Beşe b. Mehmed, Mehmed Ali Reis b. Abdülbaki, Hüseyin Bey b. Abdi, el-Hâc Ali b. Muslu, el-Hâc Süleyman Çukadâr.