Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 897 Hüküm no: 734 Orijinal metin no: [167a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın ev hissesini Ahmed Çelebi’ye sattığı Mahmiye-i İstanbul’da Hoca Üveys mahallesinde sâkine iken bundan akdem vefât eden Fâtıma bt. Berber Mehmed Çelebi nâm sagīrenin verâseti zevce-i metrûku Ahmed Çelebi b. Mercan Mehmed Çelebi ile vâlidesi Âlime Hatun bt. Abdullah’a ve li-ebeveyn kız karındaşı Âişe nâm sagīreye münhasıra ve tashîh meselesi sekiz sehmden olup sihâm-ı mezbûrenin üç sehmi zevci mezbûra ve iki sehmi vâlidesi mezbûre Âlime’ye ve üç sehmi kız karındaşı sagīre-i mezbûre Âişe’ye isâbet ve intikāl eylediği şer‘an zâhir ve mütebeyyin oldukdan sonra mahmiye-i mezbûrede Denizabdal mahallesi ahâlîsinden Mustafa Ağa b. Salih mahfil-i kazâda bâ‘isü’l-kitâb zevci mezbûr Ahmed Çelebi muvâcehesinde ikrâr ve takrîr-i kelâm edip akd-i âtî sudûruna değin silk-i mülkümde münselik olup zikr olunan Denizabdal mahallesinde vâki‘ bir tarafdan Çiçekçi Abdullah Çelebi mülküne ve bir tarafdan ba‘zan Kurabiyecizâde Mehmed Çelebi bahçesi ve ba‘zan Saliha Hatun bahçesi ve ba‘zan merhûm Odabaşı bahçesi ve bir tarafdan Ahmed Ağa mülkü ve bir tarafdan tarîk-i âmma müntehî dâhiliye ve hâriciyeyi müştemil mülk menzilimin sekiz sehmden üç sehm-i şâyi‘ini on dokuz bin üç yüz elli sağ akçe mukābelesinde bi-cümle’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr Ahmed Çelebi’ye bey‘ u teslîm ve temlîk ol dahi iştirâ ve temellük ve kabûl edip semeni olan meblağ-ı mezbûr on dokuz bin üç yüz elli sağ akçeyi mezbûr Ahmed Çelebi’nin zevcesi olup vefât eden sagīre-i mezbûre Fâtıma’ya işbu istiğlâl hücceti nâtıka olduğu üzere zimmetimde vâcibü’l-edâ deynim olan elli bir bin altı yüz sağ akçeden tashîh-i mezbûr üzere merkūm Ahmed Çelebi’ye isâbet eden on dokuz bin üç yüz elli sağ akçeye takas ol dahi mukāssa ve kabûl etmekle menzil-i mahdûd-ı mezkûrun sekiz sehm-i şâyi‘inden üç sehm-i şâyi‘i mezbûr Ahmed Çelebi’nin mülk-i müşterâsı ve hakk-ı sarîhi olmuşdur keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a kayd-şüd. Fî 11 min-şehri Rebî‘ülevvel sene 1110 Şuhûdü’l-hâl: Mukayyid Mustafa Efendi b. Mehmed, Yahya Efendi b. Mustafa Efendi, es-Seyyid İsmail Efendi b. es-Seyyid Ahmed Efendi, Muhzır Mehmed Beşe b. Hüseyin, Hasan Beşe b. Abdullah, Mustafa Çavuş b. Ahmed el-Mübâşir, İskilibli Mehmed Efendi b. Mahmud.