Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 907 Hüküm no: 744 Orijinal metin no: [168b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin vasisi olduğu torunu Rukiye’ye ait arsayı satmasına izin verildiği Mahmiye-i İstanbul’da Unkapanı kurbünde Haraccı Kara Mehmed mahallesinde sâkine olup bundan akdem <> Rumeli’nde Tulca nâm kasabada müsâfiren vefât eden Ahmed Çelebi b. Mustafa’nın sagīre kızı Rukiye’nin tesviye-i umûruna bâ-hüccet-i şer‘iyye vasiyy-i muhtârı ve sagīre-i mezbûrenin vâlidesi Âişe Hatun’un babası işbu râfi‘ü’l-kitâb Mustafa Çelebi b. Ramazan meclis-i şer‘de bi’l-vesâye ikrâr ve takrîr-i kelâm edip müteveffâ-yı mezbûr Ahmed Çelebi b. Mustafa’nın ile’l-vefât icâreteyn-i ma‘lûmeteyn ile taht-ı icâresinde olup ba‘de vefâtihî intikāl-i âdî ile kızı sagīre-i mezbûre Rukiye’ye isâbet ve intikāl eden mahalle-i mezbûrede vâki‘ merhûm-ı mezbûr Haraccı Kara Mehmed Vakfı’na beher şehr on [169a] beşer akçe icâre-i müeccelesi olan müteveffâ-yı mezbûra intimâ ile tahdîd ve tavsîfden müstağnî arsa-i sırfa-i muhterikenin hâsılı harcına vefâ etmeyip ve müceddeden itmâma mal-ı sagīre-i mezbûre dahi olmayıp ve beher şehr müeccelesi cânib-i vakfa verilmek sagīre-i mezbûreye muzır olmağla zikr olunan arsa-i muhterike bi’l-izni’ş-şer‘î ve ma‘rifet-i mütevellî bedel-i misli ile âhara ferâğ ve tefvîz ve bedel-i ferâğ vech-i şer‘î üzere i‘mâl olunup hâsıl olan nemâsı sagīre-i mezbûrenin levâzımına harc ü sarf olunmak sagīre-i mezbûre hakkında nef‘-i mahz olmağla zikr olunan arsa-i muhterike vech-i meşrûh üzere bâ-ma‘rifet-i mütevellî âhara ferâğ ve tefvîze kıbel-i şer‘den bi’l-vesâye izin taleb ederim dedikde vasiyy-i mezbûrun kelimât-ı meşrûhası vâkı‘a mutâbıka olduğu mahalle-i mezbûre ahâlîsinden Ali Çelebi b. el-Hâc Mehmed ve el-Hâc Hüseyin b. el-Hâc Ömer ve Şa‘bân Çelebi b. Mehmed ve el-Hâc Ebubekir b. Ömer nâm kimesneler haberleriyle lede’ş-şer‘ zâhir ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri zikr olunan vakıf arsa-i muhterikeyi vech-i muharrer üzere bâ-ma‘rifet-i mütevellî bedel-i misli ile âhara ferâğa vasiyy-i mezbûra izin vermeğin mâ-vaka‘a bi’t-taleb ketb-şüd. Fî gurreti Cumâdelûlâ sene 1110 Şuhûdü’l-hâl: el-Hâc Ömer b. ( ) el-Müezzin, el-Hâc İsmail bin el-Hâc Ömer, Ahmed Çelebi b. Derviş, Mustafa Çelebi b. Hasan, Yusuf Çelebi b. ( ) Berber.