Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 906 Hüküm no: 743 Orijinal metin no: [168b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali’nin vasisi olduğu Fatıma Hatun’a hissesini ödemesi Mahmiye-i İstanbul’da Ayasofya kurbünde Üskübî mahallesinde sâkin iken bundan akdem vefât eden Cüce Mustafa Ağa b. Halil’in verâseti sulbiye kebîre kızı Fâtıma Hatun ile sagīr oğulları Halil ve İbrahim’e münhasıra olup ba‘dehû mezbûrân Halil ve İbrahim dahi müte‘âkiben vefât edep verâsetleri mezbûre Fâtıma’ya münhasıra oldukdan sonra zâtı ta‘rîf-i şer‘î ile mu‘arrefe olan mezbûre Fâtıma Hatun meclis-i şer‘-i hatîr-ı lâzımü’t-tevkīrde el-Hâc Ali b. Abdullah mahzarında üzerine da‘vâ ve takrîr-i kelâm edip mezbûr el-Hâc Ali benim ve karındaşlarım müteveffiyân-ı mezbûrânın hâl-i sıgārımızda vasiyy-i mansûbumuz olmağla babamız müteveffâ-yı mezbûrun terekesinden ber-mûceb-i defter-i kassâm-ı askerî ba‘de ihrâci’l-mesârif dört bin elli sağ akçe ile icâreteyn-i ma‘lûmeteyn ile babamız müteveffâ-yı mezbûrun tasarrufunda olup mahmiye-i mezbûrede Cibalikapısı hâricinde vâki‘ vakıf Yâhûdihâne ba‘de vefâtihî intikāl-i âdî ile bize intikāl etmekle altı buçuk senede icâresinden yüz on üç bin dört yüz sağ akçe kabz edip ve karındaşlarım sagīrân-ı mezbûrân vefât edip zikr olunan Yâhûdihâneden hisseleri cânib-i vakfa âid olmağla benim hissemi dahi bedel-i misli ile âhara ferâğ lâzım gelmeğin iki yüz yirmi guruş dahi hissemin bedel-i ferâğından kabz edip cem‘an makbûzu olan yüz kırk üç bin sekiz yüz sağ akçenin yetmiş beş bin üç yüz sağ akçesini müddet-i mezbûrda benim ve karındaşlarım sagīrân-ı mezbûrânın nafaka-i mefrûzasına sarf edip ve kırk altı bin yetmiş akçesini zikr olunan Yahûdihânenin imâret ve meremmetine sarf edip ve sekiz bin altı yüz kırk akçesine bana bir çift altın bilezik ve bir inci küpe ve bir kürk ve bir hatâyî kaftan alıverip bâkī zimmetinde on üç bin yedi yüz doksan sağ akçe kalmağla meblağ-ı mezbûru taleb ederim suâl olunsun dedikde gıbbe’s-suâl mezbûr el-Hâc Ali cevâbında kaziyye bâlâda tafsîl olunan vech üzere olduğunu ikrâr etmekle alâ-mûcebi i‘tirâfihî meblağ-ı bâkī-i mezbûr on üç bin yedi yüz doksan sağ akçeyi mezbûre Fâtıma Hatun’a teslîme mezbûr el-Hâc Ali’ye tenbîh olunup mâ-vaka‘a kayd-şüd. Fî 10 min-Receb sene 1110 Şuhûdü’l-hâl: es-Seyyid Abdülmuti Efendi, Yahya Efendi b. el-merhûm Mustafa Efendi, Nikâtî Ali Efendi, Rûşenî Mehmed Efendi, Ahmed Efendi b. Mehmed.