Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 909 Hüküm no: 746 Orijinal metin no: [169a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Saraç Mustafa Çelebi’den intikal eden evin hanımı Belkıs Hatun’a satıldığı Husûs-ı âti’l-beyânın mahallinde ketb ü tahrîri içün kıbel-i şer‘den me’zûnen bi’t-taleb irsâl olunan es-Seyyid İsmail Efendi b. el-merhûm es-Seyyid Ahmed Efendi mahmiye-i İstanbul’da Kazasker Mehmed Efendi mahallesinde vâki‘ el-Hâc İbrahim’in menziline varıp zeyl-i sahîfede muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Sinanpaşa mahallesinde sâkin iken bundan akdem vefât eden Saraç Mustafa Çelebi b. Osman’ın kebîr oğlu ve tesviye-i umûruna vasiyy-i muhtârı olmağla terekesine vaz‘-ı yed eden Abdullah Çelebi meclis-i ma‘kūd-ı mezbûrda müteveffâ-yı merkūmun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan hâfızatü’l-kitâb Belkıs Hatun bt. Abdullah mahzarında bi’l-vesâye ikrâr-ı tâm ve takrîr-i kelâm edip akd-i âti’z-zikrin sudûruna değin müteveffâ-yı mezbûrun mülk ve hakkı olduğu müsbet olup zikr olunan Sinanpaşa mahallesinde vâki‘ bir tarafdan Âişe Hatun mülkü ve bir tarafdan Salih Çelebi mülkü ve bir tarafdan Ahmed Ağa mülkü ve bir tarafdan tarîk-i âm ile mahdûd fevkānî iki oda ve tahtânî bir oda ve bir matbah ve bi’r-i mâ ve kenîfi ve bir mikdâr havluyu müştemil mülk menzili münâdîlerden Hasan b. ( ) yediyle doksan gün mikdârı sûk-ı sultânîde nidâ ve müzâyede olunup rağabât-ı nâs bi’l-külliye münkatı‘a oldukdan sonra mezbûre Belkıs Hatun üzerine yüz elli beş guruşda karâr edip ziyâde ile tâlib-i [169b] âhar zuhûr etmemeğin menzil-i mahdûd-ı mezkû[r] bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mezbûre Belkıs Hatun’a meblağ-ı mezbûr yüz elli beş guruşa bi’l-vesâye bey‘ u temlîk ve teslîm ol dahi vech-i muharrer üzere iştirâ ve temellük ve tesellüm ve kabûl ettidiğinden sonra semeni olan meblağ-ı mezbûr yüz elli beş guruşu yedinden bi’l-vesâye alıp kabz eyledim ba‘de’l-yevm menzil-i mahdûd-ı mezkûr mezbûre Belkıs Hatun’un mülk-i müşterâsı olmuşdur keyfe mâ teşâ ve tehtâr mutasarrıf[e] olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan İbrahim b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 11 min-Recebi’l-ferd sene 1110 Şuhûdü’l-hâl: Fahrü’l-kuzât İsmail Efendi, es-Seyyid Mehmed Efendi b. Veliyüddin, el-Hâc Mehmed b. İbrahim, Mehmed Çelebi b. Receb, Hüseyin Beşe b. Mehmed, Ömer Çelebi b. Hüseyin, Ali Çelebi b. Mustafa, Süleyman Çelebi b. el-Hâc Mehmed.