Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 910 Hüküm no: 747 Orijinal metin no: [169b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Rukiye Hatun’un küçük kızı ile süt annesine nafaka takdir edildiği Dârü’l-hilâfeti’l-aliyye Kostantıniyyetü’l-mahmiyede İstanbul’da Tarsus mahallesinde sâkine iken bundan akdem vefât eden Rukiye Hatun bt. Ahmed’in vâlidesi olup zâtı ta‘rîf-i şer‘î ile mu‘arrefe olan hâfızatü’l-kitâb Havva Hatun bt. Mustafa meclis-i şer‘-i şerîf-i enverde müteveffiye-i mezbûrenin sagīre kızı olup bi-hakkı’l-hıdâne hacr ü terbiyemde olan Hadîce nâm <> radî‘anın mal-ı müntakilinden kisve-bahâ ve murdi‘asına nafaka farz ve takdîr olunmak matlûbumdur dedikde mezbûre Havva Hatun’un takrîr-i meşrûhu vâkı‘a mutâbıka idiği zeyl-i vesîkada muharrerü’l-esâmî Müslimîn haberleri ile lede’ş-şer‘i’l-enver zâhir ve mukarrer oldukdan sonra hâkim-i muvakkı‘-i sadr-ı kitâ[b] tûbâ-lehû ve hüsnü-meâb efendi hazretleri radî‘a-i mezbûrenin murdi‘asına mal-ı müntakilinden yevmî iki para ücret ve kisve-bahâ ve sâir levâzım-ı zarûriyesi’çün dahi yevmî üç para farz ve takdîr buyurup meblağ-ı mefrûz-ı mecmû‘-ı mezbûr yevmî beş parayı radî‘a-i mezbûrenin levâzım-ı zarûriyesine harc ü sarfa vakt-i hâcetde istidâneye ve lede’z-zafer malına rücû‘a mezbûre Havva Hatun’a izin birle mâ-vaka‘a kayd-şüd. Fî 9 min-Recebi’l-ferd sene 1110 Şuhûdü’l-hâl: es-Seyyid Abdülmuti Efendi, Şeyhzâde Ahmed Efendi, Şeyh Mehmed Efendi, Yahya Efendi b. Ahmed Efendi, Rûşenî Mehmed Efendi, Nikâtî Ali Efendi.