Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 911 Hüküm no: 749 Orijinal metin no: [169b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin vefat eden babası Süleyman Çelebi’de alacağı olduğunu ispat ettiği Mahmiye-i İstanbul’da Molla Hüsrev mahallesinde sâkin iken bundan akdem vefât eden Süleyman Çelebi b. Şa‘bân b. Abdullah’ın verâseti zevce-i menkûha-i metrûkesi Saliha bt. Abdullah ile kebîr oğulları İbrahim Beşe ve Halil’e ve sagīre kızları Âişe ve İsmihan’a ve mezbûre Saliha’nın batnında müstebîn hamle ve sagīr oğlu Ahmed’e ve sagīre kızı Emine’ye ve gāibe kızı Âişe’ye münhasıra oldukdan sonra mezbûr İbrahim Beşe mahfil-i kazâda zikr olunan sagīre Âişe ve İsmihan ve hamlin vasiyeleri olup zâtı ta‘rîf-i şer‘î ile mu‘arrefe olmağla terekesine vaz‘-ı yed eden mezbûre Saliha ile sagīr-i mezbûr Ahmed ve Emine ve gāibe-i mezbûre Âişe’nin vasiyeleri olup zâtı ta‘rîf-i şer‘î ile mu‘arrefe olan Hadîce bt. İbrahim mahzarlarında üzerlerine da‘vâ ve takrîr-i kelâm edip babam müteveffâ-yı mezbûr Süleyman Çelebi b. Şa‘bân b. Abdullah’ın yüz dokuz senesi Ramazan bayramının üçüncü günü sefere gider olduğumda kendi malımdan elli iki guruşluk para bi-tarîkı’l-emâne îdâ‘ ve teslîm ol dahi ber-vech-i muharrer emâneten kabz edip mücehhelen [170a] fevt olup terekesinden damân lâzım gelmeğin taleb ederim suâl olunsun dedikde gıbbe’s-suâl mezbûreler cevâblarında vech-i muharrer üzere terekesinden vaz‘-ı yedlerini ikrâr ve müdde‘î-i mezbûrun vech-i muharrer üzere müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden mahmiye-i mezbûrede Vâlide Câmi‘i kurbünde sâkin Ali Odabaşı b. Mehmed ve İmâm Ali odalarında sâkin Ömer Beşe b. Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Süleyman Çelebi b. Şa‘bân b. Abdullah’a târîh-i merkūmda işbu müdde‘î-i mezbûr sefere gider olduğu hâlde kendi malından elli iki guruşluk para bi-tarîkı’l-e[mâ]ne îdâ‘ ve teslîm müteveffâ-yı mezbûr Süleyman Çelebi dahi huzûrumuzda emâneten kabz edip mücehhelen vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Fî 10 min-Recebi’l-ferd sene 1110 Şuhûdü’l-hâl: Mukayyid Mustafa Efendi b. Mehmed, es-Seyyid Abdülmuti Efendi, Kara Yusuf Efendi b. Veli, Çukadâr el-Hâc Süleyman, Nasuh Beşe b. Receb, Şemsi Ahmed Efendi, Pîrîzâde Mehmed Efendi, Ahmed Çelebi b. Süleyman.