Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 914 Hüküm no: 751 Orijinal metin no: [170a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vefat eden eşi Mehmed Efendi’de mehir bedeli alacağı olduğunu ispat ettiği Mahmiye-i İstanbul’da Haydarpaşa mahallesinde sâkin iken bundan akdem vefât eden Şeyh Mehmed Efendi b. İbrahim b. Abdullah’ın verâseti zevce-i menkûha-i metrûkesi olup zâtı mahalle-i mezbûre ahâlîsinden Saraç Ahmed Çelebi b. Mehmed ve İsmail b. Ali ta‘rîfleriyle mu‘arrefe olan hâfızatü’l-kitâb Hadîce bt. Abdullah nâm hatun meclis-i şer‘-i hatîr-ı lâzımü’t-tevkīrde müteveffâ-yı mezbûrun sulbî sagīr oğlu İbrahim ve sagīre kızı Âişe’nin tesviye-i emrlerine kıbel-i şer‘den mansûb vasîleri olmağla terekesine vaz‘-ı yed eden Nasuh Beşe b. Yusuf mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi b. İbrahim b. Abdullah târîh-i kitâbdan altı ay mukaddem tezevvüc murâd ettikde para üç hesâbı üzere bin sekiz yüz akçe mehr-i müeccel tesmiyesiyle şuhûd mahzarında beni tezevvüc ve kabûl edip akd-i nikâh beynimizde kāim iken kable’l-edâ vefât etmekle hâlâ vasiyy-i mezbûrdan taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden zikr olunan mu‘arrifân-ı mezbûrân Saraç Ahmed Çelebi b. Mehmed ve İsmail Çelebi b. Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Şeyh Mehmed Efendi b. Abdullah târîh-i kitâbdan altı ay mukaddem tezevvüc murâd ettikde para üç akçe hesâbı üzere bin sekiz yüz akçe mehr-i müeccel tesmiyesiyle işbu müdde‘iye-i mezbûre Hadîce Hatun’u bizim huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 5 min-Receb sene 1110 Şuhûdü’l-hâl: es-Seyyid Abdülmuti Efendi, Uşşâkī Mehmed Efendi b. Ahmed, Ahmed Çelebi b. Süleyman, Hüseyin Çelebi b. Abdullah.