Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 924 Hüküm no: 761 Orijinal metin no: [172b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mahmud Efendi’nin iki hizmetçisini küçük kızı Zeyneb’e hibe ettiğinin tescil edildiği Mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden merhûm Mahmud Efendi b. Hasan’ın sulbiye sagīre kızı Zeyneb’in tesviye-i umûruna li-ecli’d-da‘vâ vasî nasb olunan bâ‘isü’l-kitâb İbrahim Efendi b. Yusuf mahfil-i kazâda müteveffâ-yı mezbûrun zevce-i menkûha-i metrûkesi olup zâtı Sekbanbaşı İbrahim Ağa mahallesinde sâkin Mehmed Efendi b. Halil ve Mustafa Efendi b. Musa ta‘rîfleriyle mu‘arrefe olmağla terekesine bi’l-verâse vaz‘-ı yed eden Safiye Hatun bt. Ahmed Efendi mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûra rıkkiyetlerine mu‘terif işbu terekesinde olan Yusuf b. Abdullah nâm gulâm ile Bedahşan bt. Abdullah nâm câriyesini kızı sagīre-i mezbûre Zeyneb’e hîbe-i sahîha-i şer‘iyye ile hîbe ve temlîk ve velâyeten kabz eylediğini ikrâr ve işhâd ve i‘lân edip fevt oldukda gulâm ve câriye sagīre-i mezbûrenin mülk-i mevhûbu olmuş iken mezbûre Safiye Hatun tereke-i müteveffâ-yı mezbûrdan olmak üzere bi-gayr-ı hakkın vaz‘-ı yed ve sagīre içün teslîmden imtinâ‘ eder suâl olunsun dedikde gıbbe’s-suâl ve’l-inkâr vasiyy-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden Sekbanbaşı İbrahim Ağa mahallesi sükkânından Mehmed Efendi b. Halil ve Davudpaşa Medresesi’nde sâkin Mustafa Efendi b. Musa li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Mahmud Efendi b. Hasan fevtinden üç sene mukaddem hâl-i sıhhatinde mülkünde olup müteveffâ-yı mezbûra rıkkiyetlerine mu‘terif işbu terekesinde olan Yusuf b. Abdullah nâm gulâmını ve Bedahşan nâm câriyesini kızı sagīre-i mezbûre Zeyneb’e hîbe-i sahîha-i şer‘iyye ile hîbe ve temlîk ve velâyeten kabz eylediğini huzûrumuzda ikrâr ve i‘lân ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî gurreti Receb sene 1110 Şuhûdü’l-hâl: Eş-şâhidûnü’s-sâbikūn