Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 923 Hüküm no: 760 Orijinal metin no: [172a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un vefat eden eşi Mahmud Efendi’nin evinin bir kısmını kendisine hibe ettiğini ispat ettiği Mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden Mahmud Efendi b. Hasan’ın verâseti zevce-i menkûha-i metrûkesi Safiye Hatun bt. Ahmed Efendi ile sagīre kızı Zeyneb’e münhasıra olduğu şer‘an zâhir ve mütebeyyin oldukdan sonra zâtı mahalle-i mezbûre sükkânından el-Hâc Osman b. el-Hâc İbrahim ve Mehmed Efendi b. Halil ta‘rîfleriyle mu‘arrefe olan hâfızatü’l-kitâb zevcesi mezbûre Safiye Hatun mahfil-i kazâda müteveffâ-yı mezbûrun tesviye-i umûruna li-ecli’d-da‘vâ vasî nasb olunan İbrahim Efendi b. Yusuf mahzarında üzerine da‘vâ ve takrîr-i kelâm edip zevcim müteveffâ-yı mezbûr Mahmud Efendi b. Hasan fevtinden iki sene mukaddem hâl-i kemâl-i sıhhatinde silk-i mülkünde münselik olup mahalle-i mezbûrede vâki‘ arsasının merhûme Kamer Hatun Vakfı’na senede yedi yüz yirmi akçe icâresi olup binâsı mülkü olan bir tarafdan el-Hâc Yusuf mülkü ve bir tarafdan Odabaşı Hatunu mülkü ve iki tarafdan tarîk-i âmma müntehî hâriciye ve dâhiliyede büyût-ı adîdeyi müştemil mülk menzilinin müfrez ve mu‘ayyen olan dâhiliyesini ba‘de’t-tahliyeti’ş-şer‘iyye ve’t-tekābüzi’l-mer‘î bana hîbe-i sahîha-i şer‘iyye ile hîbe ve temlîk ben dahi ittihâb ve tesellüm ve temellük ve kabûl edip menzil-i mezbûrun dâhiliyesi benim mülk-i mevhûbum olmuş iken vasiyy-i mezbûr bana teslîmden imtinâ‘ eder suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mu‘arrifân-ı mezbûrân el-Hâc Osman b. el-Hâc İbrahim ve Mehmed Efendi b. Halil li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mahmud Efendi b. Hasan fevtinden iki sene mukaddem hâl-i kemâl-i sıhhatinde silk-i mülkünde olup mahalle-i mezbûrede vâki‘ arsasının merhûme Kamer Hatun Vakfı’na senede yedi yüz yirmi akçe icâresi olup <> binâsı mülkü olan hâriciye ve dâhiliyede büyût-ı adîdeyi müştemil menzil-i mahdûd-ı mezbûrun müfrez ve mu‘ayyen olan dâhiliyesini ba‘de’t-tahliyeti’ş-şer‘iyye ve’t-tekābüzi’l-mer‘î zevcesi işbu müdde‘iye-i mezbûre Safiye Hatun’a huzûrumuzda hîbe-i sahîha-i şer‘iyye ile hîbe ve temlîk ve teslîm ol dahi ittihâb ve temellük ve kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. <> Fî 23 min-Cumâdelâhire sene 1110 Şuhûdü’l-hâl: Eş-şâhidûnü’s-sâbikūn.