Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 930 Hüküm no: 768 Orijinal metin no: [173b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mustafa’nın evinin Altmışbirinci Ağa Bölüğü Para Vakfı’na olan borcu için satıldığı Mahmiye-i İstanbul’da Altıbohça mahallesinde sâkin iken düyûnu terekesinden ezyed olduğu hâlde bundan akdem vefât eden el-Hâc Mustafa b. Pehlivan el-Hâc Osman’ın tesviye-i umûruna kıbel-i şer‘den vasî ve kayyım nasb olunan el-Hâc Mehmed b. İbrahim mahfil-i kazâda Dergâh-ı âlî yeniçerilerinin altmış birinci ağa bölüğüne mahsûs oda neferâtının nukūd-ı mevkūfelerine bi’l-fi‘il mütevellî olan Ali Odabaşı b. Ahmed mahzarında ikrâr ve takrîr-i kelâm edip müteveffâ-yı mezbûrun ile’l-vefât mülk ve hakkı olup Yoros kazâsına tâbi‘ Anadoluhisarı’nda Sinan Efendi mahallesinde vâki‘ bir tarafdan Emine Hatun mülkü ve bir tarafdan dere ve bir tarafdan tarîk-i hâs ve bir tarafdan tarîk-i âm ile mahdûd dâhiliye ve hâriciyesinde büyût-ı adîde ve hadîkayı müştemil mülk menzili istiğlâl hücceti mûcebince müteveffâ-yı merkūm hayâtında mal-ı vakf-ı mezbûrdan mütevellî-i merkūm yedinden istidâne ve kabz eylediği iki yüz guruş mukābelesinde merhûn olduğu mukaddemâ isbât ve hükm ve hüccet olmağla bey‘i lâzım <> gelmeğin münâdîlerden Murtaza b. Abdullah yediyle sûk-ı sultânîde üç ay mikdârı nidâ ve müzâyede olunup ba‘de inkıtâ‘i’r-rağbe yüz on guruşda mezbûr Ali Odabaşı’nın üzerinde karâr edip ve meblağ-ı mezbûr menzil-i mezbûrun el-yevm semen-i misli olmağla tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Ali Odabaşı’ya yüz on guruşa ba‘de’l-fek vesâyet-i mahkiyem hasebiyle bey‘ u teslîm ol dahi iştirâ ve tesellüm ve kabz eyledikden sonra semeni olan meblağ-ı mezbûru bi’t-tamâm ahz u kabz eylediğimden sonra müteveffâ-yı mezbûr deynine mahsûb olmak üzere mütevellî-i mezbûra meblağ-ı mezbûr yüz on guruşu edâ ve teslîm ol dahi vakıf içün ahz ve kabûl eyledi ba‘de’l-yevm menzil-i mahdûd-ı mezbûr merkūm Ali Odabaşı’nın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a kayd-şüd. Fî 8 min-Cumâ[de]lûlâ sene 1110 Şuhûdü’l-hâl: Ali Ağa b. Ömer, Sinan Efendi b. Ali, Ahmed Ağa b. el-Hâc Osman, Ahmed Efendi b. el-Hâc Üveys, Molla Ali b. Fethullah, Berber Osman b. Ömer.